Kriza në kopshtet suedeze: Grupet e fëmijëve janë shumë të mëdha

Mësuesit e kopshteve në Suedi ngrejnë alarmin për grupet e fëmijëve, të cilat janë shumë më të mëdha se rekomandimet e autoriteteve. Një raport i ri nga Sveriges Lärare tregon se 70% e mësuesve shpesh e kanë të vështirë të mbikëqyrin fëmijët siç duhet, ndërsa tetë nga dhjetë punojnë në grupe që tejkalojnë kufijtë e vendosur nga Skolverket (Agjencia Suedeze e Arsimit).

Situata prek drejtpërdrejt zhvillimin e fëmijëve, të cilët nuk marrin stimulimin e nevojshëm kognitiv, gjuhësor dhe emocional. Mësuesit paralajmërojnë gjithashtu për rreziqe të mëdha në kopshte, ku mungesa e mbikëqyrjes mund të çojë në dëmtime fizike dhe ngacmime mes fëmijëve.

– Fëmijët kanë nevojë për vëmendje, marrëdhënie të ngushta dhe udhëzim nga të rriturit. Kur kjo mungon, ata rrezikohen dhe bëhen më të ekspozuar ndaj konflikteve dhe lëndimeve, thotë Anna Olskog, kryetare e Sveriges Lärare, për TV4 Nyheterna.

Kopshtet nuk ndjekin rekomandimet

Sipas Skolverket, grupet në kopshte nuk duhet të kenë më shumë se 12 fëmijë për moshat më të vogla dhe 15 për fëmijët më të mëdhenj. Megjithatë, shumica e kopshteve në vend e tejkalojnë këto shifra, duke shkaktuar shqetësime serioze për cilësinë e kujdesit dhe sigurinë e fëmijëve.

Ndërkohë, sindikata e mësuesve kërkon masa urgjente nga qeveria, për të rritur numrin e edukatorëve dhe për të siguruar që grupet e fëmijëve të jenë në përputhje me normat e rekomanduara.