Kryetarja e të rinjve të SD: “Islami nuk ka vend në Suedi”

Kryetarja e rinisë së Demokratëve të Suedisë (Ungsvenskarna), Denice Westerberg, mbajti një fjalim shumë të ashpër kundër islamit gjatë mbledhjes kombëtare të partisë, raporton agjencia TT.

Ajo deklaroi se organizata e saj nuk dëshiron të lejojë ndërtimin e asnjë xhamie të re në Suedi.

“Dikush duhet të guxojë ta thotë, islami nuk ka vend në Suedi”, tha Westerberg para delegatëve.

Në fjalimin e saj, Westerberg pretendoi gjithashtu se Suedia ka kaluar nga të qenit një nga vendet më të sigurta në botë, në “një shembull frikësues” për shtetet e tjera.

Ajo shtoi se emigracioni ka sjellë një kulturë që, sipas saj, nuk i përket Suedisë.

“Ne nuk duam një kulturë me sjellje dominuese dhe me një qëndrim armiqësor ndaj grave. Nuk duam njerëz që flasin me altoparlant në autobus, që bërtasin nëpër klasa, që gjymtojnë fëmijët e tyre ose që i detyrojnë gratë të mbulohen”, tha Westerberg.