Kryqi i Kuq: E paprecedentë, dhe ky është vetëm fillimi A është kjo shoqëria ku duam të jetojmë?

Në media po publikohen gjithnjë e më shumë raste të adoleshentëve që dëbohen dhe familjeve që ndahen. Sipas Röda Korset “Kryqi i Kuq”, këto nuk janë raste të reja. Organizata thotë se prej kohësh ka takuar njerëzit që qëndrojnë pas këtyre lajmeve.

Bëhet fjalë për njerëz që detyrohen të lënë punën, çifte që ndahen dhe fëmijë që largohen nga e vetmja siguri që njohin. Sipas Kryqit të Kuq, këto nuk janë raste të veçuara, por pasoja të planifikuara të politikës së re të emigracionit. Organizata paralajmëron se ky është vetëm fillimi, pasi priten të miratohen edhe ligje të tjera para zgjedhjeve të vjeshtës. Këto propozime, sipas tyre, po shtyhen përpara me hetime të shpejta dhe pavarësisht kritikave të forta nga shumë institucione.

Kryqi i Kuq thotë se ndryshimet që po bëhen në ligjet e emigracionit janë të paprecedenta në Suedi dhe shtron pyetjen: a është kjo shoqëria ku duam të jetojmë?

Paralajmërimet e Kryqit të Kuq

Organizata thekson se ka paralajmëruar prej kohësh për pasojat e këtyre ndryshimeve: familje të ndara, njerëz që jetojnë në hije pa mbrojtje dhe një ligj që rrezikon të rrisë më tej cenueshmërinë. Përmes debateve, konsultimeve dhe deklaratave publike, Kryqi i Kuq ka ngritur shqetësime për pasojat që i konsideron të padrejta dhe çnjerëzore.

Sipas organizatës, kur ligjet nuk analizohen thellë, kur mungojnë studimet e pasojave dhe kur kritikat nuk merren seriozisht, dëmtohet siguria juridike. Në këto kushte, është e vështirë të flitet për “rregull dhe rend” në politikën e emigracionit.

Çfarë pritet të ndodhë?

Kryqi i Kuq paralajmëron disa pasoja konkrete:

• Vetëm leje qëndrimi të përkohshme. Lejet e përhershme po zëvendësohen me leje të përkohshme që duhet të rinovohen vazhdimisht. Kjo krijon pasiguri të vazhdueshme. Kërkesat për të qëndruar do të bëhen më të forta. Për shumë persona, marrja e shtetësisë do të jetë e vetmja rrugë drejt stabilitetit, ndërsa edhe kushtet për shtetësi do të ashpërsohen.
• Heqja e lejeve të përhershme të dhëna më parë. Personat që kanë marrë leje qëndrimi të përhershme mund të rrezikojnë t’u hiqet e drejta për të qëndruar në Suedi.
• Detyrimi për raportim. Disa autoritete do të detyrohen të raportojnë persona që dyshohen se nuk kanë leje qëndrimi. Sipas Kryqit të Kuq, kjo ka bërë që njerëzit të shmangin kërkimin e ndihmës mjekësore apo sociale, edhe kur kanë nevojë të madhe.
• Më shumë familje të ndara. Rregullat më të ashpra për ribashkimin familjar dhe kërkesat për të ardhura që kontrollohen vazhdimisht mund të çojnë në ndarje të reja. Nëse dikush humb punën ose sëmuret, mund të mos plotësojë më kushtet, dhe fëmijët mund të ndahen sërish nga prindërit.
• Rritje e ndalimeve, edhe për fëmijët. Më shumë persona pritet të mbahen të ndaluar në qëndra të caktuara gjatë procesit të azilit. Sipas organizatës, këto kushte mund të shkaktojnë probleme serioze të shëndetit mendor, sidomos për fëmijët.

Thirrje për rishikim

Kryqi i Kuq thotë se pasojat do të jenë një jetë me pasiguri, frikë dhe pritje të vazhdueshme. Fëmijë dhe të rinj që kanë mësuar gjuhën, kanë krijuar miq dhe e konsiderojnë Suedinë si shtëpinë e tyre, mund të detyrohen të largohen.

Politika e re shpesh justifikohet me argumentin se do të përmirësojë integrimin. Por sipas Kryqit të Kuq, përvoja e tyre tregon të kundërtën: pasiguria dhe presioni rrisin përjashtimin, jo integrimin.

Organizata kërkon një rishikim të plotë të politikës së emigracionit, me propozime të studiuara mirë, analiza serioze të pasojave dhe respekt për të drejtën për të kërkuar mbrojtje dhe për vlerën e barabartë të çdo njeriu.

Deklarata është nënshkruar nga Ulrika Modéer, sekretare e përgjithshme e Kryqit të Kuq Suedez.

Burimi: Aftonbladet

Link: https://www.aftonbladet.se/debatt/a/bOGpy5/roda-korset-saknar-motstycke-och-det-har-ar-bara-borjan