Kur mund të përfundoni në burg për tejkalim shpejtësie në Suedi

Në Suedi, tejkalimi i shpejtësisë zakonisht ndëshkohet me gjobë. Në disa raste më të rënda, shoferit mund t’i hiqet edhe patenta. Por ekziston edhe një pasojë tjetër, më pak e njohur: nëse gjoba nuk paguhet dhe personi shmang vazhdimisht detyrimet, ajo mund të përfundojë në dënim me burg.

Për shumicën e shoferëve, çështja mbyllet sapo paguhet gjoba. Pasojat zakonisht janë vetëm pagesa e disa mijëra koronave suedeze ose, në raste të caktuara, humbja e patentës. Megjithatë, nëse një person zgjedh të mos e paguajë gjobën, procesi nuk ndalet. Nuk mjafton ta lini njoftimin pa e hapur ose të shpresoni se detyrimi do të zhduket vetë.

Kur një gjobë për tejkalim shpejtësie nuk paguhet, çështja kalon tek autoritetet, të cilat fillimisht përpiqen të mbledhin shumën. Vetëm nëse kjo nuk është e mundur, mund të merret në shqyrtim një hap tjetër: zëvendësimi i gjobës me burg.

Rregullat për të ashtuquajturin “bötesförvandling”, që do të thotë shndërrimi i gjobës në burg, u ashpërsuan në vitin 2021. Qëllimi i këtyre ndryshimeve është të ndalohen personat që me vetëdije shmangin pagesën e gjobave ose vazhdojnë të grumbullojnë gjoba të reja pa shlyer ato të mëparshmet.

Kjo vlen për persona që fshihen nga autoritetet, nuk tregojnë adresën ku jetojnë ose fshehin të ardhurat dhe pasuritë e tyre. Po ashtu, përfshihen edhe ata që vazhdojnë të marrin gjoba edhe pse e dinë se nuk do t’i paguajnë. Autoritetet i quajnë këta persona “imunë ndaj gjobave”, sepse gjobat nuk kanë më efekt ndaj tyre.

Megjithatë, kjo nuk do të thotë se çdo person që nuk paguan një gjobë rrezikon burg. Nëse dikush merr vetëm një gjobë për tejkalim shpejtësie dhe përkohësisht nuk ka mundësi ta paguajë, zakonisht nuk dënohet me burg.

Fillimisht, Kronofogden, Autoriteti Suedez i Përmbarimit, përpiqet ta mbledhë borxhin. Kjo mund të bëhet duke mbajtur një pjesë të pagës ose duke sekuestruar pasuri të tjera të personit.

Nëse edhe këto masa nuk japin rezultat, gjykata mund të vendosë që gjoba të shndërrohet në burg. Dënimi mund të jetë nga 14 ditë deri në tre muaj.

Personi i dënuar ka ende një mundësi për ta shmangur burgun. Nëse ai paguan të gjithë borxhin para ditës kur duhet të paraqitet për të vuajtur dënimin, burgimi anulohet. Edhe nëse ka filluar ta vuajë dënimin, ai mund të lirohet nëse shlyen plotësisht gjobën.

Këto rregulla nuk zbatohen vetëm në letër. Një grua në Suedi, e cila kishte grumbulluar disa gjoba ndërsa vazhdonte të blinte mallra luksi dhe të udhëtonte jashtë vendit, vendosi t’i paguante detyrimet vetëm pasi u përball me rrezikun e dy javëve burg. Në një rast tjetër, një burri iu zëvendësuan gjobat me dy muaj burg.

Pra, nuk është shpejtësia me të cilën keni ecur ajo që ju çon në burg. Rreziku lind vetëm kur gjobat nuk paguhen dhe autoritetet vlerësojnë se mënyrat e zakonshme për mbledhjen e borxhit nuk japin rezultat.

Një rast që bëri bujë në Norvegji tregon se si funksionon ky sistem. Një shofer u kap duke ecur me 68 kilometra në orë në një rrugë ku kufiri ishte 60 kilometra në orë. Ai u gjobit me 3.300 korona norvegjeze. Në njoftimin e gjobës përmendej edhe një dënim alternativ me tre ditë burg. Shoferi bëri shaka në rrjetet sociale duke pyetur nëse duhej të paguante gjobën apo të kalonte një fundjavë të zgjatur në burg me shpenzimet e shtetit.

Në praktikë, një zgjedhje e tillë nuk ekziston. Ashtu si në Suedi, autoritetet fillimisht përpiqen të mbledhin gjobën. Burgimi merret në konsideratë vetëm kur borxhi nuk mund të arkëtohet me asnjë mënyrë tjetër.

Burimi: Carup

Link:https://carup.se/da-far-du-fangelse-for-fortkorning-i-sverige/#google_vignette