Kurthi i fshehtë që nuk e dinit në trafik: gjoba 2 000 kr dhe rrezik për heqje të patentës

Shumë shoferë bëjnë çdo ditë një shkelje në trafik pa e kuptuar, edhe pse ajo është e paligjshme. Për këtë shkelje, drejtuesit e automjeteve mund të ndëshkohen me gjobë deri në 2 000 krona dhe madje edhe me heqje të patentës.

Të gjithë e dinë se drita e kuqe në semafor do të thotë ndalim. Por shumë shoferë nuk e dinë se edhe drita e verdhë do të thotë se makina duhet të ndalet. Sipas ligjit, kalimi me dritë të verdhë konsiderohet po aq serioz sa kalimi me dritë të kuqe.

“Nëse shoferi shtyp gazin kur semafori është i verdhë, patenta mund të merret,” thotë Peter Henriksson, shef i njësisë së trafikut në Eskilstuna, për gazetën Ekuriren.

Në qytetin Eskilstuna, disa persona janë kapur duke kaluar semaforin me dritë të verdhë ose të kuqe. Dy vite më parë, dhjetë persona kaluan me sinjal të gabuar, ndërsa vitin pasues ishin shtatë. Megjithatë, këto shifra nuk tregojnë realitetin e plotë. Një kontroll ka treguar se shoferët kalojnë me dritë të verdhë ose të kuqe çdo herë të tretë që semafori ndryshon në të kuqe.

“ Ne i kontrollojmë semaforët herë pas here, por jo më shpesh se shkelje të tjera në trafik”, thotë Henriksson për Ekuriren.

Nuk ka rëndësi nëse semafori është i ngadaltë dhe pritja është e gjatë  drita e verdhë është e barabartë me të kuqen. Shumë shoferë që kanë marrë patentën para viteve 2000 kujtojnë se lejohej kalimi me dritë të verdhë. Por kjo rregullore ka ndryshuar disa vite më parë dhe sot drita e verdhë do të thotë ndalim.

Nëse policia ju kap duke shtypur gazin dhe duke kaluar vijën e ndalimit kur semafori është i verdhë, patenta merret në vend dhe rasti raportohet te Transportstyrelsen, institucioni që vendos për heqjen e patentës.

“Duhet të ndalosh te drita e verdhë, njësoj si te drita e kuqe”, thekson Henriksson.

Edhe pse kalimi me dritë të verdhë dhe me dritë të kuqe mund të çojë në humbjen e patentës, ka një ndryshim në shumën e gjobës. Që nga 21 shkurti 2025, gjoba për kalimin me dritë të verdhë është 2 000 krona, ndërsa për kalimin me dritë të kuqe është 3 000 krona.

“Kur semafori tregon dritë të kuqe, është pa dyshim e rrezikshme të kalosh vijën e ndalimit ose të vazhdosh përpara. Kur tregon dritë të verdhë, rreziku nuk është aq i madh, sepse ekziston një hapësirë kohe para se makinat dhe trafiku nga rruga tjetër të hyjë në kryqëzim. Për këtë arsye bëhet dallim mes këtyre dy rasteve”, shpjegon Johan Bülow, prokuror në Qendrën e Zhvillimit, e cila qëndron pas ndryshimit të rregullave.

Burimi: Carup.se