Malmö merr më së shumti ndihma shtetërore: “Shpërdorimi vazhdon”

Malmö është komuna që merr më së shumti ndihma shtetërore dhe fonde nga sistemi i barazimit ekonomik në të gjithë Suedinë. Sipas gazetës Sydsvenskan, Malmö përfiton çdo vit mbi 7 miliardë krona suedeze, më shumë se çdo komunë tjetër në vend.

Kjo ka shkaktuar reagime dhe kritika nga disa politikanë në komunat që kontribuojnë më shumë para në këtë sistem sesa marrin prej tij.

Daniel Källenfors nga Lidingö, përfaqësues i Partisë Moderate dhe këshilltar komunal, është një nga kritikët më të zëshëm. Lidingö bën pjesë ndër dhjetë komunat që paguajnë më shumë në sistemin e barazimit ekonomik sesa përfitojnë.

Ai shprehu pakënaqësinë e tij për mënyrën se si përdoren fondet nga Malmö.

“Unë shoh vetëm që shpërdorimi vazhdon”, deklaroi ai për Sydsvenskan.

Sipas tij, disa nga fondet po përdoren për projekte si parqe skateboardi dhe sisteme zanore, të cilat ai i konsideron shpenzime të panevojshme.

Nga ana tjetër, Katrin Stjernfeldt Jammeh, këshilltarja komunale e Malmös nga Partia Socialdemokrate, i hodhi poshtë kritikat. Ajo tha se këto reagime janë më shumë “deklarata politike” sesa kritika konkrete ndaj vetë sistemit të barazimit ekonomik.

Debati për mënyrën se si ndahen fondet mes komunave vazhdon të mbetet një çështje e diskutuar në politikën suedeze.

Burimi: Sydsvenskan/SCB

Link: https://www.sydsvenskan.se/skane/miljardregnet-over-malmo-skanes-raddning-eller-sloseri/

https://www.statistikdatabasen.scb.se/pxweb/sv/ssd/START__OE__OE0115__OE0115A/KostutkomNy/