Matpriskollen nis aktivitetin në Danimarkë

Kompania suedeze Matpriskollen po zgjerohet jashtë vendit dhe ka nisur zyrtarisht shërbimin e saj edhe në Danimarkë, raporton portali suedez Breakit. Ky është hapi i parë i kompanisë përtej urës Öresund, që lidh Suedinë me Danimarkën.

Matpriskollen funksionon përmes një aplikacioni që krahason çmimet e produkteve ushqimore. Kompania mbledh të dhëna për çmimet nga tregjet dhe supermarketet, të cilat jo vetëm i përdor në aplikacion, por i shet edhe tek kompanitë e mëdha të tregtisë ushqimore.

Sipas të dhënave financiare, të ardhurat e Matpriskollen u rritën nga 18,5 milionë korona në 22 milionë korona vitin e kaluar. Edhe fitimi operativ u rrit, nga 3 milionë në 3,3 milionë korona.

Gjatë viteve të fundit, kompania dhe veçanërisht themëluesi i saj, Ulf Mazur, janë bërë shumë të njohur në Suedi. Mazur është shfaqur shpesh në media dhe njihet si një ekspert i çmimeve, veçanërisht në periudhën kur çmimet e ushqimeve janë rritur ndjeshëm.