Mbi 5 mijë ankesa për rezultatin e zgjedhjeve brenda një dite

Komisioni për Shqyrtimin e Zgjedhjeve në Suedi ka marrë një numër rekord ankesash për rezultatin e zgjedhjeve.

Të martën, komisioni kishte marrë rreth 2 mijë ankesa, pas raportimeve për dyshime për mashtrim zgjedhor në Borlänge. Por vetëm brenda një dite, numri i ankesave u rrit me më shumë se 3 mijë, duke arritur në mbi 5 mijë. Këtë e raporton TV4 Nyheterna.

“Duhet të zgjerojmë organizatën tonë me staf nga Administrata e Parlamentit dhe të rrisim aktivitetin, në mënyrë që të përballojmë këtë situatë, thotë Emma Hellman”, drejtuese e sekretariatit të komisionit.

Bëhet fjalë për një numër rekord ankesash. Në zgjedhjet e vitit 2018, rezultati u kundërshtua nga më shumë se 700 persona, sipas Altinget. Pas zgjedhjeve të vitit 2022, numri i ankesave ishte rreth 400.

Nëse Komisioni për Shqyrtimin e Zgjedhjeve arrin në përfundimin se ka pasur mashtrim ose parregullsi në zgjedhje, mund të vendosë që zgjedhjet të përsëriten.

Megjithatë, përsëritja e zgjedhjeve është një masë shumë e rrallë. Emma Hellman thotë për DN se numri i madh i ankesave nuk tregon nëse në të vërtetë është bërë ndonjë gabim.

Krister Hammarbergh, ish-deputet i Partisë së Moderatëve dhe anëtar i komisionit, thotë për agjencinë e lajmeve TT se nuk mjafton vetëm të vërtetohet se ka ndodhur një gabim që të vendoset për përsëritjen e zgjedhjeve.

“ Duhet të ketë gjithashtu një mundësi që gabimi të ketë ndikuar në rezultatin e zgjedhjeve”, thotë Hammarbergh.

Pra, edhe nëse konfirmohet se ka pasur një gabim, duhet të vlerësohet nëse ai gabim mund të ketë ndikuar në rezultatin përfundimtar të zgjedhjeve.

Burimi: TV4/Omni/TT/Aftonbladet/Altinget/DN

Link: https://www.tv4.se/artikel/LlhzxYbe6q6NsKK9cerEc/tusentals-nya-oeverklaganden-av-valresultat-bara-sedan-igar

https://www.dn.se/sverige/expert-det-kan-rostfusk-leda-till/

https://www.altinget.se/artikel/valet-massoverklagas-kan-bli-rekord

https://www.aftonbladet.se/nyheter/a/wroK6A/kaos-pa-valprovningsnamnden-hundratals-overklaganden

https://tt.omni.se/mangder-av-anmalningar-efter-misstankt-valfusk/a/d4Akk1