Më pak persona përfitojnë ndihmë për strehim: “Rrezik të zhduket deri në 2035”

Gjithnjë e më pak suedezë po kualifikohen për ndihmat e strehimit, pavarësisht rritjes së kostove të jetesës. Shkak kryesor mbetet fakti që kufiri i të ardhurave për përfitim nga ky program nuk është rishikuar që nga viti 2021, raporton Sveriges Radio Ekot.

Ekspertët paralajmërojnë se, nëse nuk ndërmerren masa, ndihma për strehim mund të zhduket vetvetiu deri në vitin 2035.

“Është e papranueshme që ndihma nuk është përshtatur me realitetin ekonomik. Nëse kjo vazhdon, shumë familje që kanë nevojë për mbështetje do të mbeten pa asnjë ndihmë,” tha Martin Hofverberg, ekonomisti kryesor i Shoqatës së Qiramarrësve.

Sipas Hofverberg, inflacioni dhe rritja e pagave po e largojnë gradualisht klasën punëtore dhe familjet me të ardhura të ulëta nga mundësia për të përfituar ndihmën. “Nëse kufiri nuk rritet, deri në vitin 2035, askush nuk do të kualifikohet,” shtoi ai.

Nga ana tjetër, Ministrja e Çështjeve Sociale, Anna Tenje, theksoi se qeveria po ndjek situatën. “Ndihma për strehim do të vazhdojë të ekzistojë për një kohë të afërt dhe shumë individë do të vazhdojnë të përfitojnë,” deklaroi ajo, pa dhënë premtime konkrete për ndryshim të politikave aktuale.

Një politikë që s’ndjek ritmin e kohës

Shoqata e Qiramarrësve dhe organizatat e tjera të interesit kanë kërkuar rishikim urgjent të kufirit të të ardhurave, duke paralajmëruar për pasojat sociale të mosveprimit. Megjithatë, ende nuk ka sinjale të qarta se do të ketë një ndryshim në të ardhmen e afërt.

Siç qëndron tani, ndihma për strehim duket se po zbehet në heshtje, ndërsa kostot për jetesë vazhdojnë të rriten në mënyrë të vazhdueshme.