Më shumë fëmijë do të përfitojnë deri në 2 500 krona në vit. Ndryshimet hyjnë në fuqi më 10 gusht

Nga 10 gushti 2026, Fritidskortet (Karta e Aktiviteteve) do të zgjerohet, duke u dhënë mundësi më shumë fëmijëve të marrin pjesë në aktivitete të organizuara. Me rregullat e reja, disa familje do të mund të përfitojnë deri në 2 500 korona suedeze në vit për çdo fëmijë, për të mbuluar shpenzimet e aktiviteteve të lira.

Qeveria suedeze ka vendosur të zgjerojë këtë mbështetje, me qëllim që më shumë fëmijë të kenë mundësi të marrin pjesë në sport, aktivitete kulturore, veprimtari në natyrë dhe në shoqata të ndryshme, pavarësisht gjendjes ekonomike të familjes.

Edhe fëmijët 6-vjeçarë do të përfitojnë

Një nga ndryshimet më të rëndësishme është ulja e kufirit të moshës. Deri tani, Fritidskortet u jepej fëmijëve nga 7 deri në 16 vjeç, ndërsa nga 10 gushti 2026 do të përfshihen edhe fëmijët 6-vjeçarë.

Kjo do të thotë se fëmijët do të kenë mundësi të marrin mbështetje për aktivitetet e tyre që në fillim të moshës shkollore.

Mbështetje më e madhe për familjet me të ardhura të ulëta

Qeveria po ndryshon edhe rregullat për mbështetjen e veçantë të Fritidskortet. Sipas rregullave të reja, fëmijët dhe të rinjtë, prindërit ose kujdestarët e të cilëve kanë të drejtë për parapagim të shtesës së strehimit, do të kenë të drejtë të marrin një shumë më të lartë.

Mbështetja e veçantë arrin deri në 2 500 orona suedeze në vit për çdo fëmijë dhe synon t’u japë më shumë fëmijëve mundësinë të marrin pjesë në aktivitete, pavarësisht mundësive ekonomike të familjes.

Gjatë një konference për shtyp, ministri për Çështjet Sociale, Jakob Forssmed, tha:

“Fritidskortet hap dyert drejt përkatësisë, aktivitetit fizik dhe krijimtarisë, pikërisht ato që ndërtojnë një fëmijëri të sigurt dhe me kuptim. Tani po sigurojmë që më shumë fëmijë të përfshihen në këtë nismë, në mënyrë që ata të kenë mundësi të gjejnë që herët një mjedis ku mund të zhvillohen, të ndihen mirë dhe të krijojnë ndjenjën e përkatësisë.”

Synimi është mundësi të barabarta për të gjithë

Edhe ministrja e Shërbimeve Sociale, Camilla Waltersson Grönvall, tha se këto ndryshime synojnë t’u japin të gjithë fëmijëve mundësi të barabarta.

“Të gjithë fëmijët duhet të kenë një mundësi reale për të provuar aktivitete të ndryshme, për të zbuluar interesat e tyre dhe për t’u ndjerë pjesë e një komuniteti. Duke ulur kufirin e moshës dhe duke e bërë mbështetjen më të qasshme për më shumë familje, po bëjmë një hap të rëndësishëm drejt barazimit të mundësive, në mënyrë që çdo fëmijë të ketë një fillim aktiv dhe zhvillues në jetë,” u shpreh ajo.

Si do të funksionojë

Me hyrjen në fuqi të ndryshimeve më 10 gusht 2026, më shumë fëmijë do të përfshihen në skemën e Fritidskortet, ndërsa edhe më shumë familje do të kenë mundësi të përfitojnë mbështetjen financiare të zgjeruar.

Qëllimi i kësaj reforme është të ulë pengesat ekonomike që i mbajnë fëmijët larg aktiviteteve të lira dhe t’u japë familjeve me të ardhura më të ulëta mbështetje më të madhe, në mënyrë që çdo fëmijë të ketë mundësi të marrë pjesë në aktivitete që ndihmojnë në zhvillimin, mirëqenien dhe integrimin e tij në shoqëri.

Për më shumë informacione, familjet mund t’u drejtohen materialeve zyrtare të qeverisë suedeze dhe kanaleve informative të Fritidskortet.

Burimi: Nyheter24

Link: https://nyheter24.se/nyheter/ekonomi/1495173-fler-barn-far-upp-till-2-500-kronor-galler-fran-10-augusti?utm_medium=EB-Social&utm_source=Facebook&fbclid=IwdGRjcASx-DpjbGNrBLH4M2V4dG4DYWVtAjExAHNydGMGYXBwX2lkDDM1MDY4NTUzMTcyOAABHtxJJfuoDUPInx3KvHCMrutxvDfZ0nuOWyvcRieWcG_zz9TUD_PvOieuwBZq_aem_Xzl1gkjzVWgL9N9wdScpRA#Echobox=1782832384