Metroja e Stokholmit mund të pajiset me barrierë mes binarëve dhe platformave

Trafiku i Stokholmit ka nisur një studim për të shqyrtuar mundësinë e vendosjes së barrierave mes binarëve dhe platformave në disa stacione të metrosë, një masë që ka si qëllim rritjen e sigurisë për pasagjerët. Studimi do të përcaktojë cilat stacione do të mund të pajisen me këto barrierë, cilat janë zgjidhjet teknike që do të kërkohen dhe sa do të kushtojë implementimi i këtij projekti.

“Unë jam absolutisht për vendosjen e barrierave në platforma. Duhet të bëjmë gjithçka që mundemi për të minimizuar rreziqet dhe për të siguruar pasagjerët,” tha Anton Fendert, këshilltar rajonal për transportin nga Partia e Mjedisit (MP).

Megjithatë, realizimi i këtij projekti paraqet disa sfida teknike. Pjesë të platformave janë të kthyer dhe ndodhen dy lloje të ndryshme trenash të metrosë, ku dyert janë në pozita të ndryshme, faktorë që e komplikojnë implementimin e barrierave.

Për më tepër, ky projekt do të ketë një kosto të konsiderueshme. Sipas një studimi paraprak, vetëm për gjashtë stacionet e ardhshme të linjës së verdhë të metrosë, kostoja e vendosjes së barrierave do të arrijë në 350 milionë krona suedeze.

Ky projekt është pjesë e një iniciative më të gjerë për të përmirësuar sigurinë në transportin publik të Stokholmit dhe për të minimizuar aksidentet në metro.