Miliona të Suedisë përfundojnë tek “punonjës fantazmë” në Somali

Qeveria suedeze, në përpjekje për të rritur numrin e deportimeve me forcë, ka paguar tre zyrtarë somalezë përmes Ministrisë së Drejtësisë. Ata duhet të shërbenin si pika kontakti për institucione si Zyra e Migracionit. Por, sipas disa burimeve të gazetës Dagens Nyheter (DN), paratë në të vërtetë po u shkojnë tre personave që nuk kryejnë asnjë detyrë reale  “punonjës fantazmë” dhe që kanë lidhje të forta me qeverinë somaleze, si edhe janë akuzuar më parë për korrupsion.

As Zyra e Migracionit dhe as Ministria e Drejtësisë nuk i dinë emrat e këtyre personave.

Ministri i Migracionit, Johan Forssell, thotë se komunikimi me autoritetet somaleze bëhet përmes ambasadës së Somalisë në Stokholm dhe se ai nuk ka parë prova për shkelje.

Çfarë përmbajnë marrëdhëniet e qeverisë suedeze me Somalinë

• Në dhjetor 2023, Suedia nënshkroi një marrëveshje të fshehtë me Somalinë. Marrëveshja parashikonte që 100 milionë korona të ndihmës suedeze të ridrejtoheshin, me kusht që Somalia të pranonte qytetarët e saj të dëbuar me forcë.
• Marrëveshja shkaktoi konflikt të brendshëm në ambasadën suedeze në Somali. Shefja e ndihmave u dëbua, pasi kishte kundërshtuar marrëveshjen. Pas kësaj, qeveria ndryshoi udhëzimet zyrtare për agjencinë Sida.
• Sipas DN, qeveria pagoi gjithashtu pesë milionë korona përmes Ministrisë së Drejtësisë për disa shërbime që në praktikë përfunduan tek të afërm të personave të lidhur me kryeministrin e Somalisë.
• Opozita suedeze ka paraqitur ankesa ndaj disa ministrave në Komisionin Kushtetues dhe ka kërkuar dorëheqjet e tyre. Ndërkohë, qeveria këmbëngul se nuk është shkelur asnjë rregull dhe se qëllimi kryesor ka qenë rritja e rikthimeve të personave të deportuar.
• Organizata e OKB-së, IOM, mohon që ndihma e tyre të jetë përdorur për dëbime me forcë. Ekspertët paralajmërojnë se marrëveshjet paraqesin rrezik të lartë korrupsioni dhe mungesë transparence.