Ministri suedez kërkon ndalimin e reklamave për grim që ju drejtohen fëmijëve

Ministri i Çështjeve Sociale në Suedi, Jakob Forssmed, ka propozuar ndalimin e reklamave për produkte grimi dhe bukurie që i drejtohen fëmijëve nën moshën 15 vjeç.

Ai shprehet se reklamat dhe rrjetet sociale ndikojnë keq te fëmijët, duke u krijuar presion për pamjen e jashtme. “Duhet të ndalojmë bashkëpunimin e dëmshëm mes kompanive të rrjeteve sociale, influencerëve dhe industrisë së bukurisë,” tha ministri për agjencinë e lajmeve TT.

Përveç ndalimit të reklamave, ai dëshiron që çdo foto reklamuese ku është ndryshuar trupi ose fytyra, të jetë e shënuar qartë se është manipuluar.

Ministri propozon gjithashtu krijimin e një “liste mbrojtëse për fëmijët”, me produkte që nuk duhet të reklamohen për të mitur.

Ky propozim ka për qëllim të mbrojë fëmijët nga ndikimet negative që mund të dëmtojnë vetëbesimin dhe shëndetin e tyre mendor.