Ministri suedez për migracionin: Aktivistët propalestinezë nuk duhet të jenë në Suedi

Ministri i Migracionit, Johan Forssell nga Partia Moderata, ka reaguar pas ngjarjes ku një grup aktivistësh propalestinezë ndoqën ministrin tjetër suedez, Carl-Oskar Bohlin.

Forssell tha për gazetën Expressen se këta persona duhet të mund të dëbohen nga Suedia për shkak të “sjelljes së keqe”.

“Sigurisht që mund të protestosh për Palestinën. Por këta persona lavdërojnë terrorin, përndjekin përfaqësuesit e zgjedhur dhe rrezikojnë sigurinë tonë. Në këtë rast nuk ka vend për ta në Suedi”, u shpreh ai.

Hetimi i Expressen tregon se disa prej aktivistëve të përmendur nuk kanë shtetësi suedeze dhe disa prej tyre janë dënuar më parë për vepra penale.

Sipas Forssell, fakti që aksioni i tyre është konsideruar brenda kufijve të lirisë së shprehjes është një shembull i qartë se duhet ndryshuar ligji. Ai kërkon që “sjellja e keqe” të bëhet një arsye e re ligjore për dëbimin nga Suedia.