Mjekët të shqetësuar. Frikë nga kallëzimet penale për raportet mjekësore

Shoqata e Mjekëve (SLF) dhe Agjencia e Sigurimeve Shoqërore të Suedisë (Försäkringskassan) janë në konflikt për udhëzimet e reja që lejojnë kallëzim penal ndaj mjekëve që shkruajnë raporte mjekësore të pasakta, edhe nëse nuk kanë pasur qëllim të mashtrojnë.

Në pranverë, Försäkringskassan vendosi të kallëzojë penalisht mjekët që me vetëdije japin informacione të rreme për pushimet mjekësore. Por udhëzimet e brendshme shtrihen edhe te mjekët që “forcojnë” raportet për të ndihmuar pacientin të marrë përfitime. Mjekët thonë se kjo ndodh shpesh për shkak të mungesës së kohës dhe kërkesave të shumta nga vetë Försäkringskassan.

Shoqata e Mjekëve kërkoi ndryshime për të mbrojtur mjekët që veprojnë në mirëbesim. Edhe pse disa pika të dokumentit u hoqën, urdhri për kallëzimin e mjekëve pa qëllim mashtrimi mbeti.

Kryetarja e shoqatës, Sofia Rydgren Stale, thotë:

“Ne nuk duam të fabrikohen të dhëna, por mjekët duhet të jenë të lirë të përshkruajnë qartë situatën e pacientit, pa frikë nga kallëzimi penal.”

Javën e ardhshme, të dy palët do të takohen për të diskutuar përsëri. Försäkringskassan thotë se ligji është i vjetër, por mënyra e zbatimit po ndryshon.

Në thelb, debati është mes nevojës për të luftuar mashtrimet dhe sigurisë që mjekët të mund të bëjnë punën e tyre pa frikë.