Moderaterna premton 175 milionë krona për roje komunale të sigurisë në Stokholm, Goteborg dhe Malmo

Partia Moderaterna (M) ka propozuar një investim prej 175 milionë koronash suedeze për të forcuar sigurinë në tre qytetet më të mëdha të Suedisë: Stokholm, Goteborg dhe Malmo.

Në një artikull debati të publikuar në gazetën DN, katër përfaqësues të lartë të partisë kritikojnë drejtuesit socialdemokratë të këtyre qyteteve, duke thënë se ata nuk po e marrin seriozisht punën për rritjen e sigurisë dhe luftën kundër kriminalitetit në nivel lokal.

Sipas Moderaterna-s, qytetarët kanë nevojë për më shumë masa konkrete për të rritur sigurinë në lagje dhe hapësira publike. Për këtë arsye, partia njofton se do të shkojë në zgjedhjet e ardhshme me disa propozime të reja.

Mes tyre janë:

• Më shumë policë në terren.
• Më shumë kamera sigurie në vende publike.
• Më shumë roje rendi.
• Një investim prej 175 milionë kronash për krijimin e komunave pilot me roje komunale të sigurisë në Stokholm, Goteborg dhe Malmo.

Sipas propozimit, këto qytete do të shërbejnë si projekte pilot ku rojet komunale të sigurisë do të punojnë për të rritur praninë e forcave të sigurisë në rrugë, në qendra qytetesh dhe në zona ku banorët ndihen më pak të sigurt. Këto roje do të plotësonin punën e policisë dhe të rojeve të rendit.

Artikulli është nënshkruar nga ministri suedez i Drejtësisë, Gunnar Strömmer, si dhe nga tre drejtues të opozitës së Moderaterna-s në qytetet më të mëdha të vendit: Christofer Fjellner në Stokholm, Axel Josefson në Goteborg dhe Helena Nanne në Malmo.

Moderaterna thekson se qëllimi i investimit është të krijohen qytete më të sigurta dhe të rritet prania e personelit të sigurisë në komunitet, duke e bërë luftën kundër kriminalitetit një nga çështjet kryesore të fushatës së saj politike.

Burimi: DN

Link: https://www.dn.se/debatt/kommunerna-ska-fa-starkare-muskler-med-fler-ordningsvakter/