Moti ekstrem në Suedi, ndodh për herë të parë në histori.

Moti në Suedi ka arritur nivele rekord dhe është shpallur “ekstrem” nga Instituti Suedez i Meteorologjisë dhe Hidrologjisë (SMHI). Lajmi u konfirmua të hënën, pasi instituti publikoi raportin e tij për muajin shtator.

Sipas SMHI, në disa zona të veriut ra më shumë shi për vetëm 24 orë sesa bie zakonisht gjatë dy muajve të plotë.

Veçanërisht u përmendën reshjet e forta në Västernorrland, të cilat janë cilësuar si disa nga më të rënda ndonjëherë për një muaj në shtator.

Në të njëjtën kohë, u regjistruan edhe temperatura rekord të larta, shkruan gazeta suedeze Dagens Nyheter (DN), duke e përshkruar shtatorin si një “muaj me mot ekstrem”.

Meteorologu Sverker Hellström nga SMHI tha se temperatura mesatare e shtatorit ishte rekord e lartë në shumë vende, sidomos në veriun e Norrlandit dhe se diferenca ishte e dukshme krahasuar me vitet e tjera.

“Diçka që nuk ka ndodhur kurrë më parë”

Sipas Hellström, nuk ka dyshim se shtatori u dominua nga temperatura tipike verore. Në disa zona, mesatarja mujore ishte një gradë më e lartë se çdo shtator tjetër më parë.

SMHI konfirmon se bëhet fjalë për shifra historike.

Në qytete si Gällivare, temperatura mesatare e shtatorit ishte mbi 10 gradë, që teknikisht do të thotë se këto zona kishin moti veror edhe në fund të vjeshtës, diçka që nuk është shënuar kurrë më parë në këtë periudhë të vitit.

“Një verë plot kontraste”

Por rekordet nuk kufizohen vetëm në shtator.

Edhe vera e vitit 2025 ishte e pazakontë. Në veri u shënuan temperatura shumë të larta, ndërsa në jug, në Götaland, pati ngricë në gusht, një dukuri që sot është shumë e rrallë.

“Vera e këtij viti ishte plot kontraste! Kemi pasur nxehtësi rekord në veri, reshje shumë të forta shiu dhe ngricë në jug,” tha meteorologu Misha Lundgren nga SMHI.

Ai shtoi se në Luleå u regjistrua numri më i madh i ditëve me temperatura verore që nga fillimi i matjeve në vitet 1950. Përveç kësaj, përgjatë bregdetit të Norrlandit u shënuan netë tropikale, ndërsa në zonat malore u regjistruan ditë pazakonisht të ngrohta.