Nässjö nuk do të marrë pjesë në bisedimet për rikthimin e emigrantëve ja cilat komuna të tjera në Småland thonë “jo”

Komuna e Nässjö ka vendosur të mos marrë pjesë në bisedimet që qeveria suedeze po zhvillon për rikthimin vullnetar të emigrantëve në vendet e tyre të origjinës.

“Ne mendojmë se kemi gjëra më të rëndësishme për të bërë në komunën tonë sesa të ulemi në këto bisedime,” tha Sara Lindberg (S), kryetare e këshillit komunal të Nässjö.

Në një klip të publikuar, Lindberg shpjegon arsyet pse komuna ka refuzuar të marrë pjesë në takimin e propozuar nga qeveria.

Qeveria kërkoi takim për rikthimin vullnetar

Në shtator, Teresa Zetterblad, e cila është koordinatorja kombëtare e qeverisë, dërgoi një letër të gjitha komunave të Suedisë duke kërkuar takime për të diskutuar mënyrat se si mund të forcohet puna me rikthimin vullnetar të migrantëve.

Disa komuna si Jokkmokk, Norrtälje, Kiruna, Ljusnarsberg, Tibro dhe Malmö kishin bërë të ditur më herët se nuk do të merrnin pjesë në këto bisedime.

Nässjö: “Kemi gjëra më të rëndësishme për të bërë”

Të martën, Nässjö u bë komuna e parë në qarkun Jönköping që refuzon zyrtarisht ftesën e qeverisë.

Vendimi është mbështetur nga të gjitha partitë në pushtet në këshillin komunal: Socialdemokratët (S), Kristdemokratët (KD), Partia e Qendrës (C) dhe Partia e Majtë (V).

Lajmi u raportua fillimisht nga P4 Jönköping.

Ndërkohë, Demokratët Suedezë (SD) në Nässjö janë shprehur kundër këtij vendimi.

“Komuna duhet të jetë e hapur për diskutim dhe të shohë mundësinë për ta përdorur këtë nismë në mënyrë pozitive,” ka shkruar Leif Ternstedt, udhëheqësi i grupit të SD-së në Nässjö, në një njoftim për shtyp.

Edhe Vaggeryd thotë “jo”

Edhe komuna e Vaggeryd ka refuzuar të marrë pjesë në bisedimet për rikthimin vullnetar.

“Kemi arritur në përfundimin se nuk ka nevojë të punojmë me rikthimin vullnetar. Përkundrazi, për shkak të mungesës së fuqisë punëtore, duam të kemi më shumë banorë që të kontribuojnë në sektorin e mirëqenies dhe ekonomisë,” tha Kenth Williamsson (S), kryetar i këshillit komunal të Vaggeryd.

Ja si kanë reaguar komunat në Småland

• Vetlanda kommun: E hapur për dialog me qeverinë. “Është e rëndësishme të marrim pjesë në bisedime edhe kur qëndrimet tona ndryshojnë,” thuhet në reagimin zyrtar.
• Värnamo kommun: Fokusohet në integrimin dhe vetë-mjaftueshmërinë e qytetarëve që duan të qëndrojnë dhe të kontribuojnë. Informon për mbështetjen shtetërore për rikthim vullnetar, por nuk bën fushata të posaçme.
• Vaggeryds kommun: Ka refuzuar të marrë pjesë në takimin me koordinatoren kombëtare për rikthimin vullnetar.
• Nässjö kommun: Nuk pranon të marrë pjesë në bisedime. Komuna dëshiron që banorët të qëndrojnë dhe të kontribuojnë në zhvillimin lokal dhe i konsideron të gjithë si të vlefshëm.
• Mullsjö kommun: E sheh çështjen e rikthimit vullnetar si komplekse dhe të politizuar, veçanërisht në prag të zgjedhjeve. Sipas komunës, kjo temë duhet të trajtohet në kuadrin e mungesës së fuqisë punëtore dhe nevojës për emigracion pune.
• Gnosjö kommun: Ka një traditë të gjatë në integrimin e të huajve, që ka ndihmuar zhvillimin industrial dhe shoqëror. Komuna synon të krijojë kushte që njerëzit të qëndrojnë e të kontribuojnë, por gjithashtu informon për mbështetjen shtetërore për rikthimin vullnetar.

Burimi: SVT