Ndryshim i madh për deklarimin e vitit 2026. Skatteverket do të ketë më shumë mundësi kontrolli

Qeveria suedeze ka prezantuar një sugjerim që do t’i japë Autoritetit të Tatimeve (Skatteverket) më shumë mundësi përpara deklarimit të vitit 2026. Sugjerimi propozohet të hyjë në fuqi më 1 prill 2026 dhe ka për qëllim t’i japë autoritetit mandat më të madh për të kontrolluar librat e llogarive të kompanive të ndryshme.

Sipas qeverisë, projektligji do t’i mundësojë Skatteverket-it të kontrollojë librat e llogarive të kompanive përmes internetit. Qeveria thotë se qëllimi është të krijohen mënyra të reja dhe më efektive të punës dhe të lehtësohet bashkëpunimi me kompanitë që kontrollohen.

Sot, shumë kompani përdorin shërbime digjitale për llogaritë e tyre, ndryshe nga më parë, kur librat mbaheshin me dorë. Por Skatteverket nuk mund të lidhet me internetin për të bërë kontroll, sipas ligjit aktual. Kjo do të thotë se autoriteti nuk ka qasje të drejtpërdrejtë në informacion, dhe kompanitë duhet të krijojnë kopje të materialeve që më pas dërgohen te Skatteverket.

Qeveria shpjegon se kjo rrit administratën për kompanitë dhe për autoritetin dhe rrit rrezikun e gabimeve gjatë transferimit të informacionit. Gjithashtu, mund të ndodhë që kompanitë jo serioze të fshehin informacionin.

Qeveria tani propozon që ndalimi të hiqet, në mënyrë që Skatteverket të ketë qasje të drejtpërdrejtë në materialet dhe librat e llogarive. Sipas projektligjit, do të hiqen ndalimet për kontrollin përmes rrjetit telekomunikacionit, që janë në ligjin për procedurat tatimore (2011:1244) dhe ligjin për transferimin dhe kontrollin e disa mallrave tatueshme (1998:506).

Kjo do t’i japë autoritetit mundësi më të madhe për të kontrolluar kompanitë që dyshohen për mashtrim ose që nuk duan të bashkëpunojnë. Skatteverket do të ketë leje të përdorë informacion elektronik përmes internetit edhe kur një kompani nuk bashkëpunon, thekson qeveria.