Ndryshime në zonat e energjisë: Stokholmi mund të paguajë më shumë

Pas shumë muajsh pritje, pritet që kompania shtetërore e energjisë në Suedi, Svenska Kraftnät, së bashku me katër organizata të tjera, të prezantojnë të hënën një propozim të ri për ndarjen e zonave të çmimit të energjisë.

Sipas këtij propozimi, banorët në jug të Suedisë mund të përfitojnë nga çmime më të ulëta, ndërsa ata që jetojnë në Stokholm rrezikojnë të paguajnë më shumë për energjinë.

Në të gjitha alternativat e prezantuara më parë, një ndryshim i madh është që Stokholmi do të bëhet një zonë më vete, ndërsa pjesa tjetër e jugut të Suedisë do të bashkohet në një zonë të vetme.

Ekspertët paralajmërojnë se kjo mund të krijojë mungesë energjie në Stokholm dhe ta rrisë çmimin për konsumatorët. “Stokholmi mund të kthehet në një zonë me deficit të madh energjie,” tha Christian Holtz, analist i tregut të energjisë.

Megjithatë, ekziston edhe mundësia që asgjë të mos ndryshojë dhe të mbeten katër zonat aktuale. Ekspertët mendojnë se është pak e mundur që Suedia të ketë vetëm një zonë të vetme energjie.