Nga 1 shtatori ndryshon arsimi për shoferët profesionistë në Suedi. Pagat arrijnë deri në 43 mijë korona në muaj

Nga 1 shtatori 2026 do të hyjnë në fuqi rregulla të reja për arsimin e shoferëve profesionistë. Ndryshimet synojnë ta bëjnë trajnimin më modern dhe më fleksibël, ndërsa sektori i transportit vazhdon të ketë mungesë të madhe të fuqisë punëtore.

Rregullat e reja kanë të bëjnë me kompetencën profesionale që është e detyrueshme për ata që duan të punojnë si shoferë kamioni ose autobusi.

Sipas Autoritetit Suedez të Transportit (Transportstyrelsen), një pjesë e mësimit do të mund të zhvillohet në distancë përmes platformave online (e-learning). Gjithashtu, një pjesë e praktikës së drejtimit do të mund të kryhet në simulatorë të avancuar.

“Një pjesë e trajnimit të drejtimit do të mund të realizohet në një simulator të avancuar”, tha Mats Hjälm, ekspert në Transportstyrelsen.

Ndryshimet do të hyjnë në fuqi më 1 shtator 2026 dhe përcaktojnë se cilat pjesë të arsimit duhet të përfshijnë drejtimin praktik, ushtrimet praktike dhe përdorimin e simulatorëve.

Arsimi bëhet më modern

Qeveria suedeze kishte vendosur më herët të ndryshonte rregullat për kompetencën profesionale të shoferëve. Qëllimi është që arsimi të modernizohet dhe të bëhet më fleksibël.

Shoqata e Kompanive të Transportit (Transportföretagen) e ka mirëpritur këtë vendim, duke vlerësuar se ai mund të ndihmojë në tërheqjen e më shumë njerëzve drejt këtij profesioni.

Sipas Caj Luoma, përgjegjës për furnizimin me fuqi punëtore në Transportföretagen, mundësia për të ndjekur mësimin në distancë mund të bëjë një ndryshim të madh për të tërhequr më shumë kandidatë.

Edhe Maria Sjölin Karlsson, zhvilluese e sektorit në të njëjtën organizatë, tha se një sistem më fleksibël u jep njerëzve më shumë mundësi për të përshtatur studimet me jetën familjare dhe angazhimet e përditshme.

Mijëra shoferë të rinj kërkohen në Suedi

Nevoja për shoferë vazhdon të jetë shumë e madhe. Sipas Organizatës së Transportit dhe Mjedisit të Punës (TYA), gjatë vitit të fundit janë punësuar mbi 5.600 shoferë kamionësh.

Megjithatë, gjatë 12 muajve të ardhshëm do të nevojiten edhe mbi 4.000 punonjës të rinj. Po ashtu, 36% e kompanive të transportit kanë deklaruar se kanë pasur vështirësi për të gjetur punonjës me kualifikimet e nevojshme.

Kjo tregon se sektori vazhdon të ketë mungesë të fuqisë punëtore edhe pas ndryshimeve në sistemin e arsimit.

Pagat arrijnë deri në 43 mijë korona

Përveç kërkesës së lartë për punonjës, edhe pagat janë tërheqëse.

Sipas statistikave të Agjencisë Suedeze të Punësimit (Arbetsförmedlingen), të bazuara në të dhënat e SCB-së:

• Shoferët e kamionëve kanë një pagë mesatare prej 34.600 koronash në muaj, para tatimit.
• Shoferët e autobusëve fitojnë mesatarisht 33.400 korona në muaj.
• Shoferët e pirunëve  (truck) kanë një pagë mesatare rreth 36.000 koronash në muaj.

Punonjësit më të paguar në profesionin e shoferit të pirunit ngritës fitojnë mbi 43.000 korona në muaj, ndërsa ata me pagat më të ulëta marrin më pak se 29.900 korona.

Më shumë mundësi për ata që duan të ndryshojnë profesion

Edhe pse një pjesë e arsimit do të zhvillohet online, trajnimi nuk do të jetë plotësisht në distancë. Praktika dhe drejtimi i automjetit do të vazhdojnë të jenë pjesë e detyrueshme e programit.

Sipas Transportstyrelsen, para zbatimit të plotë të sistemit të ri do të kontrollohet nëse materialet e mësimit në distancë plotësojnë kërkesat për identifikimin e pjesëmarrësve, kohën e nevojshme për përfundimin e trajnimit dhe cilësinë e mësimit.

Ndryshimet pritet ta bëjnë arsimin më të lehtë për t’u ndjekur dhe njëkohësisht të ndihmojnë sektorin e transportit të plotësojë nevojën për mijëra shoferë të rinj në të gjithë Suedinë.

Burimi: Nyheter24

Link:https://nyheter24.se/nyheter/motor/1496097-bristyrket-andras-1-september-med-lon-pa-43-000-kronor?utm_term=Autofeed&utm_medium=EB-Social&utm_source=Facebook&fbclid=IwdGRleAS40V5wZG9mAWZkaWQWUKAStXU0efnCTU3pcZsknlCi1I71pWV4dG4DYWVtAjExAHNydGMGYXBwX2lkCjY2Mjg1NjgzNzkAAR4uhBPhnBT-YezsMRYgqKNwbu2T0_yzfpG10AoCgn0SC0Qj49yzDij3qF131g_aem_Fdr0-fgD-n5Nn5dtz7iV3w#Echobox=1783328812