Një tarifë e re për energjinë elektrike do të futet në Suedi jo më vonë se viti 2027.

Një tarifë e re për energjinë elektrike do të futet në Suedi jo më vonë se viti 2027. Kjo tarifë, e njohur si taksa e fuqisë (effekttaxa), pritet të rrisë koston e faturës së rrjetit elektrik, raporton Ekot.

Sipas ekspertëve, për të shmangur fatura më të shtrenjta, familjet duhet të përpiqen të shpërndajnë konsumimin e energjisë gjatë ditës. Kjo do të thotë të mos përdorin disa pajisje shtëpiake në të njëjtën kohë, si lavatriçen, enëlarësen apo furrën.

Nëse përdoren shumë pajisje njëkohësisht, rreziku është krijimi i një “kulmi të fuqisë”, që ndikon drejtpërdrejt në rritjen e kostos. Kështu shpjegon Lars Hällentorp, këshilltar për energjinë dhe klimën për disa komuna në perëndim të Suedisë.

“Unë vetë kam një tarifë çmimi ku llogariten tre kulme fuqie në muaj. Mesatarja e këtyre tre kulmeve është ajo shumë për të cilën paguaj”, thotë ai.

Autoritetet theksojnë se zakonet e përditshme të përdorimit të energjisë do të kenë një rol të madh në atë se sa e lartë do të jetë fatura mujore në të ardhmen.