Normat e Ulëta të Interesit dhe Dimri i Butë Reduktojnë Shpenzimet për Banesat

Shpenzimet e shoqërive të banesave në Suedi kanë rënë në nivelin më të ulët të dy viteve të fundit gjatë tremujorit të katërt të vitit 2024. Kjo ka ndodhur si rezultat i uljes së ndjeshme të normave të interesit dhe një dimri të butë që ka ulur kostot e ngrohjes. Të dhënat janë publikuar nga SBC (Shoqata e Shoqërive të Banesave), ndërsa lajmi raportohet nga agjencia TT.

Ekspertët shpjegojnë se faktorët kryesorë pas këtij zhvillimi janë përmirësimet ekonomike që kanë ulur normat e interesit për kreditë, si dhe temperaturat më të larta se zakonisht gjatë muajve të fundit, të cilat kanë reduktuar konsumin e energjisë për ngrohje.

Megjithatë, Markus Pålsson, ekspert i SBC-së, paralajmëron që shoqëritë e banesave të mos e shohin këtë si një arsye për të ulur tarifat për anëtarët.

“Ky është një zhvillim i përkohshëm, veçanërisht në lidhje me kostot e energjisë dhe ngrohjes. Nëse dimri i ardhshëm do të jetë normal, atëherë shpenzimet mund të rriten sërish,” tha ai në një deklaratë për TT.

Ekspertët këshillojnë shoqëritë që të përfitojnë nga kjo situatë për të krijuar rezerva financiare dhe për t’u përgatitur për shpenzime të mundshme më të larta në të ardhmen.