Numri i udhëtarëve që udhëtojnë pa biletë në transportin publik të Västtrafik është ulur ndjeshëm

Numri i udhëtarëve që udhëtojnë pa biletë në transportin publik të Västtrafik është ulur ndjeshëm që nga momenti kur kompania vendosi të përdorë kontrollorë civilë. Sipas gazetës GP, sot vetëm rreth 5–6% e udhëtarëve kapen pa biletë, një shifër që vjen nga tremujori i dytë i vitit 2025 dhe që tregon se mashtrimet janë përgjysmuar.

Sipas Cecilia Wallem, e cila drejton departamentin e shitjeve në Västtrafik, kontrollorët civilë janë arsyeja kryesore për këtë përmirësim. Ajo shton se edhe rritja e numrit të kontrolleve, si edhe komunikimi më i qartë me publikun, kanë luajtur rol të rëndësishëm.

Megjithatë, futja e kontrollorëve civilë nuk ka kaluar pa probleme. Vendimi u kritikua ashpër në fillim dhe solli një valë të shtuar dhune ndaj kontrollorëve, çka detyroi sindikatën të vendoste një ndalim sigurie për punonjësit.