OKB-ja kundërshton ministrin suedez për dëbimet drejt Somalisë

Agjencia e Kombeve të Bashkuara për Emigracionin (IOM) ka mohuar deklaratat e ministrit suedez të emigracionit, Johan Forssell, i cili kishte thënë se paratë që qeveria e Suedisë i ka dërguar Somalisë kanë ndihmuar për të lehtësuar dëbimet e shtetasve somalezë nga Suedia.

Sipas raportimit të gazetës suedeze Dagens Nyheter (DN), IOM ka reaguar përmes një deklarate nga selia e saj qendrore në Gjenevë, duke sqaruar se “IOM nuk kryen dhe as nuk ndihmon në kthime me detyrim”.

Pagesa për zyrtarë të lidhur me pushtetin në Somali

Pak javë më parë, e njëjta gazetë kishte zbuluar se qeveria suedeze kishte paguar pesë milionë krona për të punësuar tre persona në zyrën e parlamentit të Somalisë. Burime me njohuri për çështjen thanë se këto vende pune ishin dhënë të afërmve të personave të lidhur me rrethin e ngushtë të kryeministrit somalez.

Ministri Forssell kishte pohuar se pagesat ishin bërë dhe kontrolluar nga IOM, dhe se tre punonjësit e financuar nga Suedia merreshin ndër të tjera me identifikimin e somalezëve që kishin kryer krime në Suedi dhe që duhej të dëboheshin me forcë.

Marrëveshje e fshehtë dhe akuza për korrupsion

Skandali lidhet me një marrëveshje të fshehtë që Suedia nënshkroi me Somalinë në dhjetor 2023. Sipas hetimit të Ekot, qeveria suedeze pranoi të ridorëzonte 100 milionë krona ndihmë zhvillimi, me kusht që Somalia të pranonte të kthejë qytetarët e saj të dëbuar nga Suedia.

Nga kjo shumë, pesë milionë krona u paguan përmes Ministrisë së Drejtësisë për tre pozicione pune, të cilat sipas burimeve iu dhanë të afërmve të njerëzve pranë kryeministrit të Somalisë, me paga mujore mbi 100 mijë krona.

Kritika dhe kërkesa për dorëheqje

Marrëveshja dhe pagesat kanë shkaktuar kritika të ashpra nga opozita suedeze, e cila ka paraqitur ankesa në Komisionin Kushtetues (KU) dhe ka kërkuar dorëheqjen e ministrit të emigracionit Johan Forssell.

Qeveria ka mbrojtur veprimet e saj, duke thënë se nuk është shkelur asnjë rregull dhe se gjithçka është bërë në mënyrë të ligjshme. Por pas reagimit të IOM-it, këto pretendime janë vënë seriozisht në pikëpyetje.

Paralajmërime për korrupsion

Organizata Transparency International dhe disa ekspertë të pavarur kanë paralajmëruar se marrëveshja me Somalinë mbart rrezik të lartë korrupsioni. Ata kanë kërkuar më shumë transparencë dhe llogaridhënie për mënyrën se si po përdoren paratë e ndihmës suedeze në Somali.

Burimi: DN