Paludan sfidon ndalimin e policisë, djeg Kuranin në Kopenhagen (Video)

Rasmus Paludan ka ndezur debat të ri pasi dogji një Kuran jashtë ambasadës turke në kryeqytetin danez. Veprimi i tij, i dokumentuar në një video të postuar në rrjetin social X, vjen vetëm disa ditë pas vrasjes së Salwan Momika, një tjetër person i njohur për djegien e Kuranit.

Ngjarja ka ngritur shqetësime sigurie në Danimarkë. Pas vrasjes së Momikës, shërbimi danez i sigurisë PET dhe policia e Kopenhagës kontaktuan Paludanin, duke i ndaluar çdo demonstrim në qytet për 24 orët e ardhshme. Pavarësisht këtij ndalimi, politikani danezo-suedez sfidoi autoritetet dhe të shtunën dogji një Kuran në një hapësirë publike.

Ky akt ka shkaktuar reagime të forta, si në nivel kombëtar ashtu edhe ndërkombëtar. Autoritetet daneze ende nuk kanë komentuar mbi pasojat e mundshme të shkeljes së ndalimit nga Paludan.