Pandemia rëndon bizneset suedeze: 34 miliardë krona taksa të papaguara

Pasojat e pandemisë së COVID-19 vazhdojnë të rëndojnë mbi kompanitë suedeze, duke çuar shumë prej tyre drejt falimentimit. Borxhi i papaguar i taksave nga bizneset ka arritur në 34 miliardë korona, sipas një raporti të publikuar nga Dagens Industri.

Gjatë pandemisë, qeveria u ofroi kompanive mundësinë për të shtyrë pagesat e taksave si një masë mbështetëse për të përballuar krizën ekonomike. Megjithatë, kjo zgjidhje ka rezultuar të jetë një barrë e rëndë për shumë biznese, veçanërisht ato në sektorin e tregtisë me pakicë, i cili ishte ndër më të goditurit.

“Shuma po bie ngadalë, por 34 miliardë është ende një sasi e jashtëzakonshme parash,” deklaroi Henrik Hargéus, analist në kompaninë e të dhënave dhe analizave Dun & Bradstreet.

Ai shtoi se këto borxhe kanë ndikuar ndjeshëm në rritjen e falimentimeve që nga janari i vitit 2023. “Me kalimin e kohës, situata ka bërë që gjithnjë e më shumë kompani të mos mund ta përballojnë këtë presion financiar,” theksoi ai.

Sektori i tregtisë me pakicë mbetet më i prekuri, me një të katërtën e kompanive të rrezikuara nga falimentimi. Ekspertët paralajmërojnë se, nëse nuk merren masa për të lehtësuar barrën financiare, më shumë biznese mund të shkojnë drejt mbylljes në muajt e ardhshëm.