Papunësia më e lartë në Skåne, rritje e madhe në Västerbotten.

Papunësia në Suedi ka shënuar rritje gjatë tremujorit të dytë të vitit 2025. Sipas të dhënave të reja nga Shërbimi i Punësimit, tani janë 363 mijë persona të papunë, krahasuar me 344 mijë në të njëjtën periudhë të vitit të kaluar. Përqindja e papunësisë është rritur nga 6,6% në 6,9%.

Rritja më e madhe e papunësisë është regjistruar në qarkun Västerbotten. Arsyeja kryesore është mbyllja e fabrikave të prodhimit të baterive, që solli shumë pushime nga puna dhe falimentime kompanish.

Megjithatë, në disa qarqe papunësia ka rënë, si në Dalarna, Gotland, Gävleborg dhe Norrbotten.

Skåne ka papunësinë më të lartë në vend me 9%, ndërsa Norrbotten ka papunësinë më të ulët me vetëm 3,8%.

Papunësia më e ulët:

• Gällivare (Norrbotten) 2,4%
• Kiruna (Norrbotten) 2,6%
• Öckerö (Västra Götaland) 2,7%

Papunësia më e lartë:

• Perstorp (Skåne) 13,2%
• Malmö (Skåne) 12,3%
• Landskrona (Skåne) 11,3%