Paralajmërim: Mashtruesit përpiqen të vjedhin të dhëna me deklaratat tatimore

Me afrimin e sezonit të deklarimit të tatimeve, Fondacioni i Internetit paralajmëron për rritjen e tentativave të mashtrimit. Keqbërësit po dërgojnë mesazhe dhe email-e duke u shtirur si administrata tatimore suedeze, Skatteverket, me qëllim që të mashtrojnë qytetarët.

– Skatteverket nuk dërgon kurrë deklaratat përmes SMS ose email-i. Nëse merrni një të tillë, dijeni se është një mashtrim, thotë Björn Appelgren nga Fondacioni i Internetit për agjencinë e lajmeve TT.

Ai bën thirrje për kujdes dhe ndan disa këshilla të rëndësishme:

✅ Mos klikoni mbi asnjë link në mesazhe të dyshimta.
✅ Mos hapni skedarë të bashkëngjitur nga burime të panjohura.
✅ Mos jepni kurrë të dhënat tuaja personale, si numra kartash, kode apo fjalëkalime.

Ekspertët theksojnë se mashtruesit po përdorin metoda gjithnjë e më të sofistikuara për të manipuluar qytetarët. Prandaj, çdo komunikim i dyshimtë duhet të raportohet menjëherë dhe të verifikohet drejtpërdrejt me Skatteverket përpara se të merren veprime.