Paralajmërim për mashtrim të dyfishtë. kujdes mos paguani “faturën”

Një mashtrim i ri me e-mail po qarkullon në Suedi, ku viktimat marrin dy mesazhe radhazi që duken sikur vijnë nga i njëjti dërgues. Autoritetet dhe kompanitë paralajmërojnë qytetarët që të jenë shumë të kujdesshëm dhe të mos paguajnë asnjë “faturë”.

Shumë suedezë kanë qenë tashmë viktima ose objektiv i mashtrimeve të ashtuquajtura phishing, ku mashtruesit përdorin SMS dhe e-mail për të mashtruar njerëz të pafajshëm.

Sipas policisë, mashtrimi synon që viktima të dorëzojë të dhëna personale ose bankare, të cilat mashtruesit më pas i përdorin për të vjedhur para.

Hiqen si kompani dhe autoritete të njohura

Mashtruesit shpesh shtiren sikur përfaqësojnë kompani të njohura, organizata të mëdha ose edhe institucione shtetërore suedeze.

Nëse dërguesi duket si një autoritet i besueshëm, si për shembull Skatteverket, njerëzit kanë më shumë gjasa të klikojnë në lidhje të rrezikshme ose të japin informacione të ndjeshme.

Gjatë viteve, shumë institucione kanë paralajmëruar për mashtrime të bëra në emrin e tyre, përfshirë Postkodlotteriet, Statistiska centralbyrån (SCB) dhe Swish. Tani, edhe një kompani tjetër ka dalë me paralajmërim.

Sa të përhapura janë mashtrimet në Suedi?

• Gjatë vitit 2024 u raportuan 230 330 raste mashtrimi (pa përfshirë mashtrimet me ndihma sociale).
• Kjo përbën një ulje prej 3 për qind krahasuar me vitin 2023, që do të thotë 8 041 raste më pak.
• Megjithatë, numri i mashtrimeve është 24% më i lartë se në vitin 2015.
• Statistikat paraprake për gjysmën e parë të vitit 2025 tregojnë se mashtrimet janë kategoria e krimit që po rritet më shpejt.

Burimi: Këshilli Suedez për Parandalimin e Krimit (Brå)

Mashtrim me “faturë të papaguar” nga Telia

Aktualisht po qarkullojnë dy e-maile mashtruese, ku dërguesi duket sikur është kompania e inkasos Intrum.

Në e-mailin e parë, i cili dërgohet fillimisht, thuhet se marrësi ka një faturë të papaguar te Telia Suedi.

Në mesazh shkruhet se Intrum ka marrë një njoftim nga operatori telefonik dhe se fatura nuk është konfirmuar si e paguar. Marrësi nxitet të klikojë një lidhje për të “rregulluar situatën”.

Nëse mashtruesit nuk arrijnë sukses me këtë e-mail, ata dërgojnë një të dytë.

Mashtrimi i dytë  “rimbursim i dyfishtë”

Në e-mailin e dytë pretendohet se bëhet fjalë për një pagesë të bërë dy herë.

Në mesazh thuhet se:

• çështja është shqyrtuar,
• një pagesë është bërë dy herë,
• dhe se Intrum do të kryejë rimbursimin e shumës së paguar dy herë.

Edhe ky mesazh përmban lidhje mashtruese, të cilat nuk duhet të hapen.

Intrum: Nuk dërgojmë kurrë inkaso me e-mail

Kompania Intrum konfirmon se bëhet fjalë për mashtrim dhe paralajmëron në faqen e saj zyrtare.

“Intrum nuk dërgon kurrë kërkesa inkasoje me e-mail. Ne mund të dërgojmë SMS. Nëse jeni të pasigurt, hyni me BankID në “Mina sidor” dhe paguani aty, në vend që të klikoni lidhje”, shkruan kompania.

Intrum thekson gjithashtu se mashtruesit përdorin edhe emra të kompanive të tjera të inkasos, prandaj qytetarët duhet të jenë të kujdesshëm pavarësisht se nga vjen kërkesa.

Këshilla nga policia, si të mbroheni?

Policia u jep qytetarëve këto këshilla:

• Mos jepni kurrë të dhëna bankare, të dhëna karte ose informacione personale.
• Mos klikoni në lidhje në SMS ose e-mail që kërkojnë kode ose informacione personale.
• Asnjë bankë apo kompani serioze nuk kërkon të dhëna të ndjeshme me mesazh.
• Nëse jeni të pasigurt, telefononi drejtpërdrejt bankën ose kompaninë.
• Përdorni fjalëkalime të ndryshme dhe unike për e-mailin, bankën dhe e-identifikimin.
• Mos lejoni kurrë kontroll në distancë të telefonit ose kompjuterit tuaj.

Burimi: Policia/Nyheter24

Link: https://nyheter24.se/nyheter/ekonomi/privatekonomi/1453792-varning-for-dubbelbluff-betala-inte-fakturan