Paralajmërim për reshje të dendura në Östergötland Policia: Lëreni makinën në shtëpi

Policia u bën thirrje banorëve të Östergötlandit që të mos përdorin makinat gjatë pasdites dhe mbrëmjes së sotme, pasi zona është përfshirë nga një paralajmërim portokalli për reshje të dendura shiu.

Sipas parashikimeve, nga ora 15:00 deri në orën 21:00 pritet të bien mes 60 dhe 80 milimetra shi.

Zëdhënësja e policisë, Martina Gradian, tha për gazetën Corren se reshjet e mëdha brenda një kohe të shkurtër rrisin ndjeshëm rrezikun e rrëshqitjes së automjeteve mbi ujë (aquaplaning), gjë që mund të përfundojë me pasoja të rënda.

Edhe meteorologia kujdestare e Institutit Meteorologjik Suedez (SMHI), Marie Staerk, në një intervistë për TT paralajmëroi se situata mund të bëhet shumë e vështirë.

SMHI u bën thirrje qytetarëve të marrin masa paraprake për të mbrojtur pronat e tyre nga përmbytjet. Autoriteti këshillon që të zhvendosen sendet që mund të dëmtohen nga uji, si dhe të pastrohen ulluqet, pusetat e ujërave të shiut dhe rrugët e tjera të kullimit, në mënyrë që uji të rrjedhë pa pengesa.

Gjithashtu, drejtuesit e mjeteve këshillohen të mos kalojnë me makinë nëpër grumbuj uji, pasi përmbytjet mund ta bëjnë qarkullimin shumë të vështirë. Për shkak të shikueshmërisë së dobët dhe rrezikut të aquaplaning-ut, qytetarët duhet të planifikojnë më shumë kohë për udhëtimet dhe të përshtatin shpejtësinë.

SMHI paralajmëron gjithashtu se reshjet e dendura mund të shkaktojnë vonesa ose anulime në transportin publik.

Burimi: Polisen/SMHI/TT/Corren

Link: https://www.smhi.se/vader/prognoser-och-varningar/varningar-och-meddelanden/varningar

https://www.corren.se/nyheter/ostergotland/artikel/smhi-utfardar-orange-varning-for-skyfall-i-ostergotland/r0e87mkj