Paralajmërim për rrufe në jugun e Suedisë: Autoritetet këshillojnë të shmanget larja në ujë

Një stuhi e fuqishme me bubullima, e shoqëruar me reshje të dendura shiu, po përfshin paraditen e së mërkurës pjesën më jugore të Suedisë.

Instituti Meteorologjik i Suedisë (SMHI) ka lëshuar një paralajmërim të nivelit të verdhë për rajonet Skåne, Blekinge, Öland dhe pjesë të Småland. Paralajmërimi është në fuqi deri në orën 11:00.

Foto:SMHI

Sipas SMHI-së, reshjet e shumta të shiut mund të shkaktojnë përmbytje dhe vështirësi në qarkullimin rrugor. Ndërkohë, aktiviteti i lartë i rrufeve mund të sjellë ndërprerje të energjisë elektrike, probleme në rrjetet telefonike, si dhe vonesa në transportin hekurudhor dhe atë ajror.

Autoritetet u bëjnë thirrje qytetarëve të tregojnë kujdes, pasi qëndrimi jashtë gjatë një stuhie me shumë rrufe mund të jetë i rrezikshëm. Ata këshillojnë që të shmangen vendet pranë objekteve të larta, si pemët dhe shtyllat, si edhe të mos lahet askush në ujë derisa moti të përmirësohet.

Burimi: SMHI

Link: https://www.smhi.se/vader/prognoser-och-varningar/varningar-och-meddelanden/varningar