Paralajmërime të shumta për borë në jug, një paralajmërim portokalli

Instituti Meteorologjik i Suedisë (SMHI) ka lëshuar disa paralajmërime për mot të keq gjatë javës së ardhshme. Janë dhënë paralajmërime të verdha dhe një portokalli. Një zonë me presion të ulët, që sjell reshje bore nga Gjermania, po lëviz drejt jugut të Suedisë.

Në juglindje të Skåne pritet të bien deri në 25 centimetra borë. Për këtë zonë, SMHI ka lëshuar një paralajmërim portokalli për reshje të dendura bore të shoqëruara me erë. Policia paralajmëron qytetarët që të mos dalin në trafik pa nevojë.

Problemet që mund të shfaqen në trafik janë grumbullimi i borës, rrëshqitja, dukshmëria e dobët dhe bora që fryhet nga era. Paralajmërimi portokalli vlen për gati një ditë të tërë, nga e hëna në orën 10:00 paradite.

“ Duhet pasur parasysh se trafiku do të jetë i vështirë. Do të jetë e rrëshqitshëm, me baltë bore dhe mund të krijohen grumbullime të mëdha bore në rrugë”, thotë Therese Fougman, meteorologe në SMHI.

Në pjesët e tjera të Skåne-s, në të gjithë Blekinge-n dhe në jug të Öland-it është lëshuar një paralajmërim i verdhë për të njëjtat kushte të motit. Këto paralajmërime zgjasin për periudha të ndryshme, nga ora 10:00 e së hënës deri në orën 15:00 të së martës.

Trafikverket: Dilni vetëm nëse është e domosdoshme

Administrata Suedeze e Trafikut, Trafikverket, paralajmëron se moti i keq mund të ndikojë seriozisht në qarkullim dhe të shkaktojë vonesa dhe probleme në trafik.

“U bëjmë thirrje drejtuesve të mjeteve të tregojnë kujdes dhe të dalin në trafik vetëm nëse është e domosdoshme”, shkruan Trafikverket në faqen e saj zyrtare.

“Ka shumë gjasa që në mëngjes, kur njerëzit shkojnë në punë, situata të jetë relativisht e qetë. Por kthimi në shtëpi mund të jetë më i vështirë. Nëse ndodhin bllokime, ekziston rreziku që njerëzit të mbeten të ngecur për një kohë të gjatë”, thotë Therese Fougman.

A duhet shmangur përdorimi i makinës?

“Të paktën duhet menduar dy herë”, thotë ajo.

Gjithashtu, të gjitha trenat që qarkullojnë mes Ystad dhe Simrishamn do të anulohen nga ora 12:00 e së hënës deri në mesnatën e natës së të martës.

Burimi: Aftonbladet

Link: https://www.aftonbladet.se/nyheter/a/lnzEr9/orange-varning-for-snofall