Partia e Gjelbër dhe Partia e Qendrës kërkojnë pezullimin e projektligjit për ndalimin e fëmijëve në qendrat e paraburgimit

Partia e Gjelbër (MP) dhe Partia e Qendrës (C) do të ndërmarrin një hap të pazakontë në Parlamentin suedez për të bllokuar pjesë të një projektligji të qeverisë që parashikon rregulla më të ashpra për personat që pritet të dëbohen nga Suedia.

Sipas gazetës suedeze Dagens Nyheter (DN), dy partitë do të kërkojnë të dielën një procedurë të quajtur “vilandeförklaring” (pezullim i përkohshëm), e cila mund të ndalojë shqyrtimin e disa pjesëve të projektligjit për një periudhë prej 12 muajsh.

Kërkesa ka të bëjë me dy pjesë të propozimit të qeverisë: sa kohë mund të mbahen fëmijët në qendrat e paraburgimit për emigracionin dhe mundësinë që, në raste të veçanta, fëmijët të ndahen nga prindërit e tyre.

Deputeti i Partisë së Qendrës, Niels Paarup-Petersen, tha se partia e tij do të përdorë çdo mundësi për të ndaluar një politikë të tillë.

“Kur kemi mundësinë të ndalojmë këtë politikë që nënkupton privimin nga liria të fëmijëve që nuk kanë kryer asnjë vepër penale, atëherë ne e shfrytëzojmë atë mundësi”, deklaroi ai për Dagens Nyheter.

Sipas politologut Tommy Möller, është shumë e rrallë që deputetët suedezë të kërkojnë një pezullim të tillë të një projektligji. Kjo procedurë përdoret zakonisht kur ekziston dyshimi se një propozim mund të bie ndesh me Kushtetutën ose kur nevojitet një shqyrtim më i thelluar.

Nëse kërkesa e Partisë së Gjelbër dhe Partisë së Qendrës miratohet në Parlament, pjesët e kontestuara të projektligjit do të mbeten të pezulluara për një vit, duke vonuar hyrjen në fuqi të rregullave të reja të propozuara nga qeveria suedeze në fushën e emigracionit.

Burimi: DN/Riksdagen

Link: https://www.dn.se/sverige/mp-och-c-vill-stoppa-forslag-med-ovanlig-regel/

https://www.riksdagen.se/sv/dokument-och-lagar/dokument/betankande/skarpta-regler-om-uppsikt-och-forvar_hd01sfu31/html/