Partitë e Marrëveshjes Tidö propozojnë heqjen e uljes së dënimit për krime të shumta

Ministri i Drejtësisë: “Nuk është e arsyeshme që disa krime, në praktikë, të mbeten pa u ndëshkuar.”

Qeveria suedeze dhe Demokratët e Suedisë (SD) prezantuan sot disa propozime të reja në kuadër të reformës së sistemit të dënimeve.

Mes propozimeve kryesore janë heqja e uljes së dënimit për personat që kryejnë disa vepra penale, heqja e arsyeve që mund të sjellin ulje të dënimit dhe vendosja e një sistemi të ri me burgim me kusht.

“Një pjesë e rëndësishme e kësaj reforme ka të bëjë me dënimet. Ajo bazohet në parimin që kriminelët e rrezikshëm duhet të jenë në burg, në mënyrë që qytetarët që respektojnë ligjin të ndihen të sigurt jashtë”, tha ministri i Drejtësisë, Gunnar Strömmer.

Më herët ishte paraqitur pjesa e parë e reformës, ku propozohej, ndër të tjera, dyfishimi i dënimeve për anëtarët e bandave kriminale dhe burgim i përjetshëm për disa raste të krimeve të rënda të përsëritura, si dhuna dhe krimet seksuale.

Në konferencën për media të së martës, ministri Gunnar Strömmer, Ingemar Kihlström (KD), Martin Melin (L) dhe Henrik Vinge (SD) prezantuan propozime të tjera.

“Sot po paraqesim disa parime themelore për mënyrën se si duhet të funksionojë sistemi kur caktohen dënimet. Qëllimi është që dënimet të jenë më të drejta”, tha Strömmer.

Propozohet heqja e uljes së dënimit për krime të shumta

Një nga ndryshimet më të rëndësishme është heqja e sistemit aktual, sipas të cilit personat që dënohen për disa vepra penale përfitojnë ulje të dënimit.

“Nuk është e arsyeshme që disa krime, në praktikë, të mbeten pa u ndëshkuar”, tha Strömmer.

Ai dha si shembull një person që dënohet për tre përdhunime. Sipas sistemit aktual ai mund të dënohet me pesë vjet burg, ndërsa me rregullat e reja dënimi mund të arrijë në nëntë vjet.

“Parimi bazë është që çdo krim të llogaritet plotësisht”, theksoi ai.

Qeveria pret që ky ndryshim të sjellë dënime dukshëm më të gjata për personat që kryejnë disa krime.

Sistem i ri me burgim me kusht

Partitë e Marrëveshjes Tidö propozojnë gjithashtu që gjykatat të përdorin më shpesh të gjithë shkallën e dënimeve, përfshirë edhe dënimin maksimal.

“Ne propozojmë ndryshime në ligj që e gjithë shkalla e dënimeve të përdoret më shpesh, edhe dënimi maksimal”, tha Henrik Vinge.

Sipas propozimit, do të hiqet parimi aktual që favorizon shmangien e burgimit dhe do të krijohet një sistem i ri me burgim me kusht. Dënimet aktuale me kusht dhe mbikëqyrja (probation) do të hiqen gradualisht.

Kjo do të thotë se gjobat dhe burgimi do të jenë format kryesore të dënimit. Në rastet e burgimit me kusht, i dënuari nuk do ta vuajë dënimin në institucion penal, por do të duhet të përmbushë masa shtesë si gjoba ditore, punë në dobi të komunitetit ose mbikëqyrje.

Hiqen edhe arsyet për uljen e dënimit

Reforma parashikon gjithashtu heqjen e të ashtuquajturave “arsye lehtësuese”, të cilat sot mund të çojnë në uljen e dënimit, për shembull për shkak të moshës së shtyrë ose gjendjes shëndetësore.

“Nuk mendojmë se është e arsyeshme që një autor i një vepre penale të marrë një dënim më të lehtë vetëm sepse humbet vendin e punës pas vendimit të gjykatës”, tha Martin Melin.

Burimi: TV4

Link:https://www.tv4.se/artikel/4M5KBZaa5lyvCkaq4wBCQE/tidoepartierna-haller-presstraeff-om-straffreformen?fbclid=IwdGRjcASwdU1leHRuA2FlbQIxMQBzcnRjBmFwcF9pZAwzNTA2ODU1MzE3MjgAAR5b6zZSudDrOxbfIxdW94XlkULUBZvjxuSg7znoSOMcdWek9FK4VMurouAw_w_aem_ETyX-HXGTwx0UViS8_eIbg