Pas 10 vitesh në Suedi, 18-vjeçarja rrezikon dëbimin

Mariam Noorali, 18 vjeçe, nxënëse e vitit të dytë në gjimnazin Tingvallagymnasiet në Karlstad, rrezikon të dëbohet nga Suedia pas dhjetë vitesh qëndrimi në vend. Ajo erdhi në Suedi së bashku me familjen e saj para dhjetë vitesh dhe vetëm pak ditë pasi mbushi 18 vjeç, u thirr në një takim për kthim pranë Zyrës së Migracionit.

Ndërsa bashkëmoshatarët e saj nisin pushimet e Krishtlindjeve, Mariam po përgatit dokumentet për të apeluar vendimin e dëbimit.

“Kur shokët e klasës shkojnë në shtëpi për të festuar Krishtlindjet, ata nuk mendojnë për atë që Zyra e Migracionit do të thotë pas pushimeve. Unë po”, shprehet Mariam.

Mariam ishte vetëm tetë vjeçe kur erdhi në Suedi. Familja e saj kërkoi azil pas një udhëtimi të gjatë dhe të rrezikshëm. Megjithatë, si shtetas irakianë, autoritetet vlerësuan se nuk kishin arsye të mjaftueshme për azil dhe kërkesa e tyre u refuzua. Sipas ligjit, familja ka apeluar vendimin disa herë gjatë viteve, por tani autoritetet kanë vendosur që Mariam të dëbohet.

E pyetur për lidhjen e saj me vendin ku pritet të kthehet, Mariam shprehet se nuk ka asnjë lidhje.

“Nuk njoh askënd atje. Nuk kam familje. Çfarë do të bëj? Ku do të jetoj? Është shumë e frikshme”, thotë ajo.

Pavarësisht pasigurisë për të ardhmen, Mariam vazhdon studimet në drejtimin ekonomi biznesi. Paralelisht, ajo ka hapur një kompani UF (ndërmarrje për nxënës), ku ka identifikuar një nevojë në sektorin e kujdesit për të moshuarit.

“Unë ofroj orë aktivitetesh për kompani që merren me kujdesin e të moshuarve, si për shembull Vardaga. Mund të jetë një shëtitje, ose të ulesh me dikë dhe t’i lexosh”, shpjegon ajo.

Mariam shpreson që pas pak më shumë se një viti të përfundojë shkollën e mesme, por aktualisht shqetësimi për familjen dhe të ardhmen e saj është i madh.

“Pas dhjetë vitesh ende nuk kemi leje qëndrimi. Ne punojmë, arsimohemi dhe kontribuojmë në shoqëri. Këto janë gjëra që Suedia ka nevojë”, përfundon ajo.

Burimi: Svt

Link: https://www.svt.se/nyheter/lokalt/varmland/efter-10-ar-i-sverige-ska-18-ariga-mariam-utvisas