Pehrson: Studiuesit e huaj me qëllime të fshehta mund të ndalohen në Suedi

Ministri i Arsimit, Johan Pehrson (L), ka deklaruar se Suedia duhet të tregohet më vigjilente ndaj rreziqeve që vijnë nga shtetet totalitare, të cilat, sipas tij, po përdorin universitetet perëndimore për qëllime të tjera përveç studimeve akademike. Në një intervistë për Dagens Industri, Pehrson theksoi se qasja e vendeve si Kina dhe Irani është “problematike” dhe se Suedia duhet të marrë masa për të mbrojtur institucionet e saj arsimore.

•Nuk mund të lejojmë asnjë individ të ndjekë programe studimore në Suedi me qëllime të tjera përveç atyre akademike, tha ai.

Ministri nuk përjashtoi mundësinë e ndalimit të studiuesve nga vende të caktuara që konsiderohen si kërcënim për sigurinë kombëtare, përfshirë Kinën dhe Iranin.

Kjo deklaratë vjen në një kohë kur shumë shtete perëndimore po analizojnë rreziqet që lidhen me spiunazhin akademik dhe transferimin e njohurive sensitive në vendet totalitare. Sipas Pehrson, është thelbësore që universitetet suedeze të jenë të kujdesshme ndaj studentëve dhe studiuesve që mund të kenë agjenda të fshehta që nuk përkojnë me misionin akademik të institucioneve.

Ende nuk dihet nëse dhe si këto masa do të implementohen, por deklaratat e ministrit kanë ngjallur debate mbi balancën midis hapjes akademike dhe mbrojtjes së interesave kombëtare të Suedisë.