Policia do të hetojë kriminalitetin në sport, me fokus futbollin

Qeveria suedeze i ka dhënë policisë një detyrë të re për të hetuar dhe hartëzuar se si rrjetet kriminale kanë hyrë në sport. Lajmi është bërë i ditur nga gazeta Dagens Nyheter. Sipas këtij vendimi, policia duhet të paraqesë një raport të plotë në vitin 2026. Hetimi do të përqendrohet veçanërisht te futbolli.

Ministri i Sportit, Jakob Forssmed nga Partia Demokristiane (KD), shprehet se qeveria është shumë e shqetësuar për këtë zhvillim. Ai thekson se ekziston rreziku që persona të lidhur me kriminalitetin të futen në strukturat e klubeve sportive dhe të përpiqen të marrin pozita pushteti.

Sipas Forssmed, kjo paraqet një kërcënim serioz për demokracinë e shoqatave sportive në Suedi, e cila konsiderohet si një nga shtyllat kryesore të lëvizjes sportive në vend. Ai paralajmëron se infiltrimi i personave kriminalë mund të dëmtojë rëndë funksionimin e drejtë dhe të ndershëm të klubeve sportive.