Policia do të konfiskojë paratë, orët dhe makinat luksoze të kriminelëve

Kriminelët që nuk mund të shpjegojnë burimin e pasurive të tyre, do të përballen me një masë të re të ashpër nga autoritetet. Duke filluar nga 8 nëntori, policia dhe prokuroria në Suedi do të kenë të drejtën të konfiskojnë pasuritë e tyre, përfshirë para, ora dhe makina luksoze, edhe pa nevojën e provave të drejtpërdrejta të një krimi.

Në një konferencë për shtyp të premten, autoritetet e drejtësisë prezantuan ligjin e ri të njohur si “konfiskimi i pavarur”. Prokurori Fredrik Jönsson shpjegoi se ky ligj synon të godasë fitimet e krimit dhe të ndalojë qarkullimin e tyre në shoqëri. “Nëse është më e mundshme që një pasuri të ketë prejardhje nga aktivitetet kriminale, ajo mund të konfiskohet,” deklaroi ai.

Hetimet do të udhëhiqen nga prokuroria, dhe çështjet do të shqyrtohen nga gjykata. Karin Jensen, koordinatore rajonale kundër ekonomisë kriminale, theksoi se ky ligj është krijuar për të goditur ata që qëndrojnë pas krimit pa përfshirje të drejtpërdrejtë. “Shumë kriminelë drejtojnë veprimtaritë nga prapavija, pa prekur drejtpërdrejt provat e krimit. Tani, ne mund t’i ndjekim ata në një mënyrë të re,” tha ajo.

Ligji i ri pritet të rrisë efektivitetin e luftës kundër krimit të organizuar dhe të dobësojë fuqinë financiare të grupeve kriminale.

Burimi: Stv.se