Policia dyshon për një qendër të madhe të alkoolit të falsifikuar në Stokholm

Policia në Suedi dyshon se në Stokholm mund të ketë një qendër të madhe ku përzihet alkool i falsifikuar, i njohur si “fulsprit”. Këtë e raporton radioja P4 Stockholm.

Gjatë muajve të vjeshtës janë shënuar disa raste të rënda, ku të rinj janë helmuar pasi kanë konsumuar alkool të përzier me tretës kimikë. Përveç kësaj, së fundmi dy të rinj 18-vjeçarë janë dënuar nga gjykata, pasi kishin shitur alkool të falsifikuar përmes rrjeteve sociale.

Sipas policisë, mënyra se si është vepruar ka qenë pothuajse e njëjtë në disa raste. Kjo i ka bërë autoritetet të dyshojnë se alkooli nuk përzihet në vende të ndryshme, por në një qendër të vetme, nga ku më pas shpërndahet përmes korrierëve te blerësit.

Polici i komunës Ludvig Sonehag Bröms thotë se në disa raste është përdorur i njëjti lloj alkooli dhe e njëjta mënyrë hollimi, çka forcon dyshimet për një organizim të centralizuar. Megjithatë, ai thekson se hetimet janë ende në vazhdim dhe se policia duhet të mbledhë më shumë prova përpara se të konfirmojë përfundimisht ekzistencën e një qendre të tillë.

Lajmi është bërë publik nga P4 Stockholm dhe është komentuar nga për gazeta Svenska Dagbladet (SvD).