Policia ka dhënë një paralajmërim të fortë për mashtrimet me BankID në Suedi.

Policia në Stokholm thotë se ka pasur disa raste ku persona të moshuar janë kontaktuar me SMS nga dikush që dukej sikur ishte kompania Klarna. Në mesazhe u është kërkuar që të telefonojnë një numër telefoni.

Kur viktimat kanë telefonuar, u është thënë se ata kishin rënë pre e vjedhjes së identitetit. Më pas u është thënë se një person nga një kompani sigurimesh do të vinte në shtëpinë e tyre për të “mbrojtur” dhe “siguruar” sendet me vlerë.

Personi që ka shkuar në shtëpitë e tyre ka qenë në të vërtetë një mashtrues. Policia tani po paralajmëron qytetarët që të mos bien pre e këtyre mashtrimeve, sepse në këtë mënyrë mund t’u boshatisen llogaritë bankare.

Llogaritë bankare boshatisen

Mashtruesi që u kap në këtë rast është dënuar për tentativë për mashtrim të rëndë dhe për pastrim parash. Ai është dënuar me 6 muaj burg.

Por policia thotë se ka shumë mashtrues të tjerë që çdo ditë përpiqen të mashtrojnë njerëzit dhe t’u marrin paratë e tyre.

Ata synojnë të marrin të dhëna të ndjeshme, si BankID, për të hyrë në llogaritë bankare dhe për t’i zbrazur ato.

Paralajmërimi i policisë

Policia thotë se mashtrimet me telefon janë shumë të përhapura dhe prekin shumë persona.

“ Ju mund të humbni para nëse mashtroheni dhe hyni në bankën tuaj ose nëse jepni kode dhe të dhëna të kartës”, thotë policia.

“ Ju gjithashtu mund të humbni para, ar dhe sende të tjera me vlerë në shtëpi. Nëse dikush ju telefonon dhe ju duket i dyshimtë, mbylleni menjëherë telefonin. Asnjëherë mos përdorni BankID me kërkesë të dikujt tjetër. Kompanitë serioze, organizatat dhe autoritetet nuk ju kontaktojnë dhe nuk ju kërkojnë kurrë të logoheni ose të jepni të dhëna personale në këtë mënyrë”.

Si të mbroheni

Mashtruesit shpesh zgjedhin persona të moshuar si viktima.

Në një fushatë për këtë problem kanë marrë pjesë edhe persona publikë si Agneta Sjödin dhe Sverker Olofsson. Policia thotë se njerëzit duhet “të guxojnë të jenë të pasjellshëm” ndaj telefonuesve të dyshimtë.

Kjo do të thotë të mbyllni telefonin kur merrni telefonata të papritura dhe të dyshimta, të mos identifikoheni me BankID dhe të mos lejoni të hyjnë në shtëpi persona të panjohur.

Të flasim për mashtrimet

Policia thotë gjithashtu se është e rëndësishme të flasim për këto mashtrime me familjarët.

“ Të jesh i përgatitur më parë për telefonata ose SMS të tilla është shumë e rëndësishme për të mos u mashtruar”, thotë policia.

Është gjithashtu e rëndësishme të flitet hapur për këto raste, që viktimat të mos ndihen në turp apo faj nëse mashtrohen.

Link i lajmit: https://marcusoscarsson.se/bank-id-varning-utfardas-konton-toms-pa-pengar/