Probleme IT-je paralizojnë transportin publik

Një defekt i madh në sistemin IT të kompanisë Nobina, operatori më i madh i transportit publik në vendet nordike, ka shkaktuar probleme serioze në qarkullimin e autobusëve në disa rajone të Suedisë.

Sipas Aftonbladet, problemet teknike kanë bërë që shumë autobusë të mos mund të dalin në rrugë. Halland është një nga zonat më të prekura, ku të gjitha linjat janë pezulluar, ndërsa Skåne gjithashtu po përballet me ndërprerje të mëdha, raporton Sydsvenskan.

“Ne operojmë në të gjithë vendin, ndaj kjo është një situatë kritike. Po punojmë pa ndërprerje për të gjetur dhe zgjidhur problemin,” deklaroi Niklas Torslund nga zyra e shtypit e Nobina për Aftonbladet.

Aktualisht, nuk ka asnjë parashikim se kur do të rikthehet normaliteti në trafikun e autobusëve, duke krijuar vështirësi të mëdha për udhëtarët në disa rajone të vendit.