Pse i ftohti vazhdon, edhe pse Toka po ngrohet

Janari i vitit 2026 ka qenë jashtëzakonisht i ftohtë në të gjithë vendin. Në të njëjtën kohë, klima në botë po bëhet gjithnjë e më e ngrohtë. Si mund të ndodhin të dyja këto gjëra njëkohësisht?

“Kujtesa jonë është mjaft e shkurtër”, thotë meteorologu Peter Kondrup.

Në pjesë të mëdha të Evropës Veriore dhe Amerikës së Veriut, janari i këtij viti ka qenë më i ftohtë se zakonisht. Në Suedi janë regjistruar temperatura nën mesataren në të gjithë vendin. Më ftohtë ka qenë në veri, ku në disa zona temperaturat kanë qenë deri në tetë gradë më të ulëta se normalja.

Peter Kondrup thekson se duhet bërë dallimi mes motit dhe klimës.

“ Tani kemi mot të ftohtë. Por klima në përgjithësi është më e ngrohtë dhe po vazhdon të ngrohet”, shpjegon ai.

Ndërsa Suedia është përfshirë nga i ftohti, në Amerikën e Jugut dhe në Australi ka pasur valë të forta të të nxehtit dhe zjarre. Sipas meteorologut, kjo lidhet me rrymat ajrore të quajtura “jet stream”, të cilat zakonisht lëvizin mbi hemisferën veriore.

Ai shpjegon se për shkak se zonat polare po ngrohen më shpejt se ekuadori, këto rryma janë bërë më të ngadalta dhe më të zgjatura. Kjo sjell lëvizje më të mëdha dhe më të ngadalta të motit, që mund të shkaktojnë periudha më të ftohta ose më të nxehta se normalja.

“Mund të krijohen luhatje shumë të mëdha, por të ngadalta dhe të zgjatura. Kjo është pasojë e ndikimit të klimës dhe e ngrohjes globale”, thotë Kondrup.

Sipas të dhënave, 12 vitet e fundit kanë qenë më të ngrohtat në nivel global. Viti 2025 ishte viti i tretë më i ngrohtë i regjistruar deri tani. Edhe pse janari i këtij viti po përjetohet si shumë i ftohtë, në një krahasim historik ai konsiderohet pjesë e një dimri relativisht të butë.

“ Janarin 2026 e ndiejmë si shumë të ftohtë. Por nëse e krahasojmë me dimrat e viteve ’40 gjatë luftës, duket si një kopje e zbehtë. Atëherë ishte vërtet ftohtë. Edhe në vitet ’80 ka pasur dimra shumë të ashpër”, thotë ai.

Gjatë 20 viteve të fundit, Suedia ka përjetuar dimra jashtëzakonisht të butë. Kjo, sipas meteorologut, mund të ketë bërë që njerëzit të harrojnë sa ftohtë mund të bëhet në dimër.

“Ne mendojmë se është shumë ftohtë, sepse është pak më ftohtë se vitet e fundit. Kujtesa jonë është e shkurtër. Jemi mësuar me ngrohjen globale dhe, kur temperaturat bien pak nën normalen, na duket sikur është acar i madh”, përfundon Peter Kondrup.

Burimi: TV4

Link: https://www.tv4.se/artikel/43OGQdAPdXlLr0Fefy2YUK/daerfoer-aer-det-rekordkallt-i-januari-trots-global-uppvaermning