Punësimi në distancë rrit nivelin e stresit. Studim i ri: Puna nga shtëpia mund të jetë më e lodhshme se sa mendohet.

Personat që punojnë kryesisht nga shtëpia raportojnë një nivel më të lartë stresi krahasuar me ata që kalojnë gjithë orarin e tyre të punës në zyrë. Një studim i ri mbi shëndetin dhe mjedisin e punës, i realizuar mbi 25,000 të punësuar, tregon se 38% e atyre që punojnë nga distanca përjetojnë “viss stress” ose “hög stress”. Për ata që punojnë në zyrë, kjo shifër është më e ulët, në 29%.

Ekspertët paralajmërojnë se shumë persona e kanë idealizuar punën nga shtëpia, duke e parë si më të rehatshme dhe më fleksibile, kur në realitet ajo mund të sjellë më shumë sfida.

– Kur je në shtëpi, duhet të organizosh takime për çdo gjë të vogël, ndërsa në zyrë bashkëpunimi ndodh natyrshëm. Përveç kësaj, puna në ambientin e zyrës ofron një kontakt social që mungon në distancë, – thotë Åsa Miemois, eksperte e shëndetit dhe kushteve të punës në Falck Hälsa och Arbetsliv.

Ndër faktorët që ndikojnë në rritjen e stresit te punonjësit në distancë përfshihen pritshmëritë për të qenë gjithmonë të disponueshëm, kufijtë e paqartë mes punës dhe jetës private, si dhe mungesa e ndërveprimit social me kolegët.

Me rritjen e punës hibride, ekspertët theksojnë nevojën për politika më të qarta mbi fleksibilitetin dhe mirëqenien e punonjësve për të shmangur lodhjen dhe stresin afatgjatë.