Qeveria suedeze arrin marrëveshje për një projekt rrugor gjigant pranë Stokholmit

Qeveria e Suedisë ka arritur një marrëveshje me Rajonin e Stokholmit dhe komunat e përfshira për ndërtimin e projektit “Östlig förbindelse” (Lidhja Lindore), raporton Mitti.

Palët kanë nënshkruar një deklaratë qëllimi për projektin, i cili pritet të kushtojë 34 miliardë korona.

Ky është një projekt i madh infrastrukture, që përfshin ndërtimin e një tuneli rrugor dhe hekurudhor nën zonën Djurgården. Tuneli do të lidhë pjesën veriore dhe jugore të rajonit të kryeqytetit, duke krijuar një unazë të plotë rrugore rreth Stokholmit.

Përplasjet politike

Prej më shumë se një viti, ka pasur mospajtime të forta midis qeverisë, që ka shtyrë përpara ndërtimin e projektit, dhe drejtimit të majtë të qytetit dhe rajonit të Stokholmit, të cilët janë kundër projektit.

Qeveria jep fonde me kushte

Marrëveshja e arritur tani do të thotë që qeveria do të japë miliarda korona shtesë për të përfunduar ndërtimin e linjës së re të metrosë dhe për të nisur zgjerimin e transportit me tramvaj në jug të Stokholmit.

Por këto para janë të kushtëzuara: rajoni dhe komunat duhet të pranojnë ndërtimin e Lidhjes Lindore.

“Tani po bëhet një hap shumë i rëndësishëm për të realizuar unazën rrugore rreth Stokholmit”, tha ministri i infrastrukturës Andreas Carlson (Kristdemokraterna) për gazetën Dagens Industri.

Ende jo një vendim përfundimtar

Megjithatë, marrëveshja nuk do të thotë se ndërtimi ka filluar.

Jakop Dalunde (Miljöpartiet), kryetar i Komisionit të Transportit në Rajonin e Stokholmit, thotë se kjo nuk është një dorëzim ndaj qeverisë.

“Qeveria u përpoq që ne të merrnim një qëndrim politik për këtë projekt rrugor që është ekonomikisht jofitimprurës, dhe gjithashtu të merrnim pjesë në financimin e tij. Ne arritëm t’i ndalim të dyja këto tentativa”,  tha ai për Mitti.

Dhoma e Tregtisë e Stokholmit ka kërkuar ndërtimin e një unaze rrugore që nga vitet 1960.

“Sotë është një ditë gëzimi”, tha Carl Bergkvist, kryeekonomist i dhomës.

Ky projekt do ta lidhë më mirë rajonin dhe është i nevojshëm për të përmirësuar udhëtimet në të gjithë Stokholmin.

Dyshime për përfitimet ekonomike

Sipas Autoritetit të Transportit (Trafikverket), projekti, ashtu siç është propozuar, do të sillte humbje ekonomike shoqërore prej 25 miliardë koronash.

Por sipas Bergkvistit, ka alternativa të tjera që mund të kenë llogari ekonomike më të mira.

Qeveria suedeze do të vazhdojë analizat për të parë si mund të përmirësohet fitimshmëria e projektit.