Qeveria suedeze: Më shumë të dënuar për krime do të dëbohen nga vendi

Qeveria suedeze po përgatit masa të reja për të siguruar që personat e dënuar për krime dhe që kanë marrë urdhër dëbimi, të largohen realisht nga Suedia.

Synimi është që dëbimet të zbatohen më shpejt dhe të mos jetë më e mundur që të dënuarit të qëndrojnë në vend duke përfituar nga ndihmat shtetërore.

“Ka ndodhur që persona që kanë kryer krime në Suedi dhe nuk duan të kthehen në vendin e tyre, të kenë marrë madje edhe ndihma sociale. Kjo duhet të marrë fund,” tha ministri i emigracionit Johan Forssell (M).

Vetëm një pjesë e vogël dëbohen sot

Gjatë viteve të fundit, gjykatat suedeze kanë dhënë rreth 17 mijë dënime çdo vit ndaj shtetasve të huaj.

Vetëm rreth 500 raste në vit, ose 2,8%, përfshijnë urdhër dëbimi nga Suedia.

Ministri Johan Forssell ka njoftuar se do të propozojë ndryshime ligjore që mund të çojnë në rritje gjashtëfish të numrit të dëbimeve.

Sipas tij, kushdo që vjen në Suedi dhe kryen krime, nuk duhet të ketë mundësi të qëndrojë këtu.

“Kush bën krime në Suedi, e ka refuzuar vetë të drejtën për të qenë këtu,” tha Forssell.

Megjithatë, policia ka vështirësi për të zbatuar të gjitha vendimet e gjykatave, edhe pse ka pasur një rritje të lehtë në numrin e dëbimeve që janë realizuar.

Vendet pritëse nuk pranojnë të dënuarit

Numri i rasteve të hapura të dëbimeve që nuk janë zbatuar është rritur ndjeshëm.

Në gusht 2025, policia raportoi 1 222 raste të pazgjidhura, pothuajse dyfish më shumë se në vitin 2022.

Një nga arsyet, sipas policisë, është se shumë nga personat e dënuar kanë shtetësi nga vende si Afganistani, Iraku dhe Somalia, që nuk pranojnë të marrin qytetarët e tyre të dëbuar.

“Duhet të bëjmë më shumë. Prandaj po e lidhim edhe ndihmën ndërkombëtare me bashkëpunimin për kthimin e të dëbuarve,” tha ministri Forssell.

100 milionë nga ndihmat, për marrëveshje me Somalinë

Së fundmi, emisioni “Ekot” zbuloi se 100 milionë krona nga buxheti i ndihmës ndërkombëtare janë shpërndarë për projekte pranë qeverisë së Somalisë, në këmbim që Somalia të pranojë qytetarët e saj që Suedia dëbon.

Opozita e ka kritikuar ashpër marrëveshjen, duke theksuar se kryeministri i Somalisë ka bërë deklarata antisemitike dhe ka lavdëruar grupin Hamas.

Por qeveria mbron marrëveshjen dhe thotë se është në përputhje me premtimet ndaj votuesve.

“Është plotësisht e arsyeshme që ndihmat të përdoren për të vendosur kushte,” shkroi ministri i ndihmës Benjamin Dousa (M) në një email pas publikimit të lajmit.

“Mjaft me përkëdhelje”

Përveç bashkëpunimit me vendet e tjera, qeveria suedeze do të propozojë rregulla të reja për të rritur presionin ndaj personave të dënuar që refuzojnë të kthehen në atdhe.

“Tani ka mbaruar koha e përkëdheljes. Nëse nuk kthehesh me dëshirë, atëherë do të kthehesh me detyrim. Do të sigurohemi që kjo të ndodhë,” tha Forssell.

Si janë rregullat sot

Sipas ligjeve aktuale, personat e dënuar me urdhër dëbimi mund të marrin leje qëndrimi të përkohshme nëse ka pengesa për zbatimin e dëbimit, për shembull kur vendi i tyre nuk i pranon.

Gjatë kësaj kohe, ata mund të përfitojnë pothuajse të gjitha ndihmat sociale dhe shërbimet e mirëqenies në Suedi.

Sipas rregullave ligjore, për të pasur të drejtë për këtë leje, personi duhet të ketë ndihmuar autoritetet në procesin e dëbimit.

Megjithatë, Forssell thotë se rregullat aktuale e bëjnë më të lehtë për të dënuarit të qëndrojnë dhe të mos bashkëpunojnë.

“Personat që kanë kryer krime në Suedi dhe nuk duan të kthehen, kanë marrë ndihma për t’u mbajtur këtu. Kjo nuk mund të vazhdojë,” shtoi ministri.

Çfarë do të ndryshojë

Qeveria do të propozojë ndryshime që do ta ashtëpërsojnë ndjeshëm ligjin.

Sipas planit të ri:

• Nuk do të jepet më leje qëndrimi e përkohshme, por dëbimi do të shtyhet përkohësisht derisa të jetë i mundur;
• E drejta për ndihma dhe shërbime sociale do të kufizohet;
• Personi do të ketë ndalim për të lënë një zonë të caktuar dhe detyrim për t’u paraqitur rregullisht në polici.

Të njëjtat masa do të zbatohen edhe për të huajt që Shërbimi i Sigurisë (Säpo) i konsideron kërcënim për sigurinë kombëtare.

Ky propozim ligjor pritet të dërgohet për shqyrtim në Këshillin e Ligjeve (Lagrådet) në fund të këtij viti.

Burimi: Expressen

Link:

https://www.expressen.se/nyheter/politik/sa-ska-fler-brottsutvisade-lamna-sverige/