Qeveria suedeze njofton për masa më të ashpra ndaj të papunëve

Qeveria suedeze ka njoftuar se do të ashpërsojë masat ndaj personave të papunë që nuk zbatojnë rregullat. Sipas një njoftimi për shtyp, kush është i papunë dhe shkel rregullat do të përballet menjëherë me pasoja ekonomike.

Ministri i Tregut të Punës, Johan Britz, tha se sanksionet do të bëhen më të rrepta për ata që zgjedhin të mos pranojnë mbështetjen.

“Për ata që zgjedhin të mos pranojnë mbështetjen, sanksionet do të ashpërsohen. Të vendosësh kërkesa do të thotë të tregosh kujdes”, u shpreh ai.

Aktualisht, Arbetsförmedlingen (Shërbimi Suedez i Punësimit) fillimisht jep një paralajmërim nëse një person i papunë nuk merr pjesë në arsimim, masa apo aktivitete të tjera të kërkuara.

Por qeveria propozon ndryshime: nëse një person nuk merr pjesë në aktivitetet e kërkuara, ai do të pezullohet menjëherë nga përfitimi i kompensimit për pesë ditë. Nëse shkel rregullat për herë të dytë, mbështetja do t’i ndërpritet për dhjetë ditë. Në rast të shkeljes së tretë, përfitimi do të ndërpritet për 45 ditë.

Burimi: regeringen.se

Link: https://www.regeringen.se/pressmeddelanden/2026/02/skarpta-sanktioner-for-deltagare-i-arbetsmarknadspolitiska-program/