Qeveria suedeze planifikon përgjysmimin e TVSH-së për ushqimet

Nga 1 prilli 2025 deri më 1 janar 2028, tatimi mund të ulet nga 12% në 6%

Qeveria suedeze dhe ministrja e Financave, Elisabeth Svantesson (Moderaterna), po përgatisin një propozim për të ulur ndjeshëm tatimin mbi vlerën e shtuar (TVSH) për ushqimet. Sipas të dhënave të siguruara nga SVT Nyheter, tatimi pritet të përgjysmohet nga 12% në vetëm 6%.

Nëse propozimi miratohet, ndryshimi do të hyjë në fuqi që nga 1 prilli i vitit të ardhshëm dhe do të zgjasë deri më 1 janar 2028.

Ky vendim është pjesë e buxhetit të ri të qeverisë, ku janë premtuar 80 miliardë korona suedeze për masa të reja ekonomike. Ende nuk është e qartë se si do të ndahen këto fonde, por burime nga qeveria tregojnë se bëhet fjalë si për masa të përkohshme për ekonominë, ashtu edhe për ndryshime strukturore afatgjata.

Në këtë paketë do të përfshihen gjithashtu ulje taksash si për bizneset, ashtu edhe për familjet, me qëllim lehtësimin e krizës ekonomike dhe përballimin e kostove të larta të jetesës.

Ulja e TVSH-së për ushqimet është diskutuar prej kohësh nga partitë e marrëveshjes së Tidö-s dhe sipas SVT, ky propozim pritet të bëhet pjesë e projektbuxhetit të ardhshëm.

Burimi: TT / SVT Nyheter