Qeveria vendos kufi për ndihmat sociale, familjet e mëdha humbin mijëra korona dhe rregulla të reja për të sapoardhurit në Suedi.

Qeveria suedeze ka propozuar një reformë të re për ndihmat sociale, e cila do të ulë shumën që marrin përfituesit. Sipas qeverisë, qëllimi është të rritet dëshira për të punuar dhe të luftohet izolimi shoqëror.

Ministrja e sigurimeve shoqërore, Anna Tenje (M), tha në konferencën për shtyp:

“Nuk ishte menduar që ndihmat të shërbenin si një mënyrë jetese për vite të tëra”.

Ndryshime për të gjithë dhe kufizim për familjet e mëdha

Reforma prek të gjithë ata që marrin ndihma, pasi norma kombëtare mbi të cilën llogaritet ndihma sociale do të shtrëngohet.

Për familjet me shumë fëmijë, futet një rregull i ri: ndihma do të kufizohet duke filluar nga fëmija i katërt.

Sipas llogaritjeve të paraqitura nga partitë e marrëveshjes Tidö, një çift me pesë fëmijë do të marrë 8 200 korona më pak çdo muaj. Një prind i vetëm me dy fëmijë do të humbasë rreth 1 500 korona në muaj.

Kur hyn në fuqi reforma?

Qeveria propozon që ndryshimet të nisin më 1 janar 2027.

Rregulla të reja për të sapoardhurit në Suedi

Një pjesë tjetër e reformës është edhe futja e një sistemi kualifikimi për sigurimin shoqëror. Nga viti 2027, kushdo që shpërngulet në Suedi duhet:

• ose të ketë jetuar në vend për pesë vjet,
• ose të ketë punuar të paktën 12 muaj nga 24 muajt e fundit, me një pagë mbi 20 000 korona.

Deputetja e partisë SD, Linda Lindberg, tha:

“Ne nuk jemi një “bufe e hapur” për popujt e botës”.