Rënie e ndjeshme në blerjet online. Konsumatorët Suedezë shpenzojnë më pak

Tregtia elektronike në Suedi ka nisur vitin me një rënie të konsiderueshme. Gjatë muajit janar, shitjet online arritën një qarkullim prej 10,9 miliardë kronash, duke rënë me 6% krahasuar me të njëjtën periudhë të vitit të kaluar, sipas raportit të fundit nga Svensk Handel.

Pavarësisht një rritjeje të lehtë në numrin e blerësve online, shuma e përgjithshme e shpenzimeve ka qenë më e ulët. Ekspertët e industrisë e shohin këtë si një tregues të qartë të sfidave ekonomike që ende po ndikojnë tek konsumatorët.

— Fillimi i dobët i vitit për tregtinë elektronike është një sinjal i qartë se shumë biznese vazhdojnë të përballen me vështirësi. Thjesht, konsumatorët ende nuk e kanë rikuperuar fuqinë e tyre blerëse, deklaroi Per Ljungberg, drejtues i inovacionit në Svensk Handel, në një komunikatë për shtyp.

Ai nënvizoi gjithashtu se pasiguria ekonomike po ndikon në të gjithë sektorin e tregtisë, dhe tregtia elektronike nuk bën përjashtim. Me këtë trend, pritet që bizneset të përballen me sfida të mëdha në muajt e ardhshëm.